काठमाडौं । सम्पर्कविहीन भएको तारा एयरको विमान खोजी गर्न अहिले नेपाली सेनाको हेलिकप्टर मुस्ताङको नर्सिङ गुम्बामा अवतरण गरेको छ ।
सो स्थानबाट नेपाली सेनाका १० र नेपाल नागरिक उड्डयन प्राधिकरणका दुई जनाको टोली सम्पर्कविहीन विमानबाट मोबाइल फोनको लोकेसन पत्ता लागेको स्थानतर्फ गएको बताइएको छ ।
विमानको खोजीमा पैदलयात्राबाट नेपाली सेना र नेपाल प्रहरीको टोलीलाई पनि परिचालन गरिएको छ भने काठमाडौँबाट हिमालयन रेस्क्यूको टोलीसमेत पठाइएको छ ।
आज बिहान पोखराबाट जोमसोमका लागि उडेको तारा एयरको ट्विन अटर विमान जोमसोम विमानस्थलमा अवतरण गर्नुभन्दा अगावै सम्पर्कविहीन भएको थियो । प्रतिकूल मौसमका कारण विमानको खोजी जारी राखिए पनि फेला पर्न सकेको छैन ।
