एजेन्सी । आईपीएल २०२२ को दोस्रो क्वालिफायर खेलमा राजस्थान रोयल्सले एकतर्फी जित हात पारेको छ ।
यो जितसँगै सञ्जु सामसनको नेतृत्वमा रहेको राजस्थानको टोली १४ वर्षपछि आईपीएलको फाइनलमा पुग्न सफल भएको छ । अब उसले उपाधि खेलमा आइतबार गुजरात टाइटन्सको सामना गर्नेछ ।
रोयल च्यालेन्जर्स बैंग्लोरले दिएको १५८ रनको लक्ष्य राजस्थानले १८.१ ओभरमा तीन विकेटको क्षतिमा पुरा गरेको थियो । जोस बटलरले फेरि एक पटक म्याच जिताउने इनिङ्स खेले र ६० बलमा १०६ रन बनाएर अविजित रहे ।
राजस्थानका लागि प्रसिद्ध कृष्णा र ओबेद म्याकोयले तीन–तीन विकेट लिए ।
रोयल च्यालेन्जर्स बैंग्लोरले दिएको १५८ रनको लक्ष्य पछ्याउँदै राजस्थान रोयल्सले बलियो सुरुवात गरेको थियो । जोस बटलर र यशस्वी जैसवालले पहिलो विकेटका लागि ३१ बलमा ६१ रनको साझेदारी गरे । १३ बलमा २१ रन बनाएर यशस्वी हेजलउडको शिकार बने ।
त्यसपछि बटलरले इनिङ्सलाई अगाडि बढाए र द्रुत ब्याटिङ गर्दै २३ बलमा आफ्नो अर्धशतक पूरा गरे । उनले दोस्रो विकेटका लागि सञ्जु सामसनसँग ३९ बलमा ५२ रनको साझेदारी गरे । १२औं ओभरमा २१ बलमा २३ रन बनाएर सामसन पेभिलियन फर्किए । त्यसपछि बटलरले तीव्र ब्याटिङ गर्दै ५८ बलमा सिजनको चौथो शतक पूरा गरे । उनले १९ औं ओभरमा हर्षल पटेललाई छक्का प्रहार गर्दै राजस्थानलाई एकतर्फी जित दिलाए ।
यसअघि राजस्थान रोयल्सले टस जितेर बैंगलोरलाई ब्याटिङको निम्तो दिएको थियो । बैंगलोरको सुरुवात फेरि खराब रह्यो र विराट कोहली दोस्रो ओभरमा ७ रन बनाएर पेभिलियन फर्किए । तर, कप्तान फाफ डु प्लेसिस र रजत पाटीदारले दोस्रो विकेटका लागि बलियो साझेदारी गरे । उनीहरुले ५३ बलमा ७० रन जोडे ।
डु प्लेसिस ११ औं ओभरमा २७ बलमा २५ रन बनाएर आउट भए । यस्तै, ग्लेन म्याक्सवेलले तीव्र पारी खेल्दै १३ बलमा २४ रन बनाए पनि ठूलो पारी खेल्न सकेनन् । उनी १४ औं ओभरमा ट्रेन्ट बोल्टबाट आउट हुन पुगे ।
अर्कोतर्फ रजतले उत्कृष्ट ब्याटिङ गर्दै १५ औं ओभरमा ४० बलमा अर्धशतक पूरा गरे । पाटीदारले ४२ बलमा ५८ रन बनाएपछि १६ औं ओभरमा उनलाई अश्विनले आउट पारेका थिए । उनी आउट भएपछि एक समयमा ठूलो स्कोरतर्फ अघि बढेको बैंगलोरको टोली लज्जित हुँदै गएको थियो र १५७ रन मात्रै बनाउन सक्यो । प्रसिद्ध कृष्णा र ओबेद म्याकोयले अन्तिम ओभरमा सानदार बलिङ गर्दा आरसीबीका ब्याट्सम्यानलाई रन बनाउनबाट जोगाए ।
दुवैको अगाडि बैंगलोरको टोलीले अन्तिम ५ ओभरमा ३४ रन मात्र बनाउन सके र यस क्रममा चार ठूला विकेट पनि गुमायो ।
फाइनल खेलः राजस्थान रोयल्स भर्सेस गुजरात टाइटन्स
समय – आइतबार ८ः१५ बजे, नरेन्द्र मोदी स्टेडियम – अहमदाबाद
