काठमाडौँ । सरकारले संसद्मा नागरिकता विधेयक अघि बढाउने तयारी सुरु गरेको छ । विसं २०७५ साउन २२ गतेदेखि नेपाल नागरिकता ऐन, २०६३ लाई संशोधन गर्न बनेको विधेयक संसद्मा छ ।
सो विधेयकलाई अघि बढाउन बिहीबार गृहमन्त्री बालकृष्ण खाण र कानून, न्याय तथा संसदीय मामिलामन्त्री गोविन्द बन्दीले सत्तामा रहेका नेकपा (माओवादी केन्द्र) का अध्यक्ष पुष्पकमल दाहाल प्रचण्डसँग छलफल गरेको बताइएको छ ।
आज बिहान प्रचण्ड निवास खुमलटारमा सो विधेयकसम्बन्धी बहसमा रहेका केही प्रावधानलाई लिएर छलफल भएको समाचार छ । खासगरी नागरिकता विधेयकमा नेपाली नागरिकसँग विवाह गरेर नेपाल आउने नागरिकलाई वैवाहिक अंगिकृत नागरिकता तुरुन्तै दिने वा निश्चि अवधिपछि दिने भन्ने विषयमा विवाद कायम छ ।
अन्य विधेयक पेश गर्ने, संसद्मा भएका विधेयकहरुलाई अघि बढाउनेसहितका विषयमा प्रचण्डसँग दुवै मन्त्रीको छलफल भएको बुझिएको छ ।
विसं २०७५ मा तत्कालीन प्रधानमन्त्री केपी शर्मा ओली नेतृत्वको सरकारले ल्याएका विधेयकहरुमा कतिपय विषयमा संशोधन आवश्यक भएकाले सुरुमा सत्ताधारी दलहरुबीच सहमति आवश्यक भएकाले प्रचण्डसँग छलफल अगाडि बढाइएको हो ।
संसद् सचिवालयमा अहिले संसद्मा ५७ वटा अलपत्र बनेका छन् । कानूनमन्त्री बन्दीले संसद्मा रहेका विधेयकसम्बन्धमा प्रधानमन्त्री शेरबहादुर देउवासँग छलफल गरेका थिए । सरकारले संसद्मा रहेका विधेयकहरुका प्रावधानलाई एकैपटक संशोधन गरेर अघि बढाउने तयारी गरेको बताइएको छ ।
