भक्तपुर । नेपाल मजदुर किसान पार्टी (नेमकिपा) का सुनिल प्रजापतिले भक्तपुर नगरपालिकाको मेयर पदमा आफ्नो अग्रतालाई फराकिलो बनाएका छन् ।
प्रजापतिले नौ हजार ४०८ मत हासिल गर्दा उनका निकटतम प्रतिद्वन्द्वी नेपाली कांग्रेसका रामप्रसाद कासुलाले एक हजार ७०३ मत मात्र ल्याएका छन् । त्यस्तै नेकपा (एमाले) का रवीन्द्र लाछिमस्यूले एक हजार १०० र नेकपा (माओवादी केन्द्र)का तुल्सीभक्त सुवालले ३१६ मत हासिल गरेका छन् ।
नेमकिपाको बिरासत मानिएको भक्तपुर नगरपालिकामा विसं २०७४ को स्थानीय तहको निर्वाचनमा पनि मेयर पदमा प्रजापति फराकिलो मतान्तरले विजयी भएका थिए । त्यतिबेला प्रजापतिले २५ हजार ७३० मत ल्याएका थिए भने उनका निकटतम प्रतिद्वन्द्वी नेपाली कांग्रेसका रामप्रसाद कासुलाले छ हजार ५६० मात्र भोट ल्याएका थिए ।
अहिले सो नगरपालिकाको उपमेयर पदमा पनि नेमकिपाले नै अग्रता बनाएको छ । नेमकिपाका उपमेयर उम्मेदवार रजनी जोशीले नौ हजार ५६८ मत पाउँदा एमालेकी रञ्जना खर्बुजाले एक हजार २०५ मात्र मत हासिल गरेकी छिन् ।
