काठमाडौं । एक अर्का बिरुद्ध सामाजिक सञ्जालमा पुराना कुरा कोट्याउदै कटाक्ष गरिहेका राप्रपा नेपालका प्रवक्ता सुरेश आचार्यले काठमाडौ महानगरपालीको प्रमुखपदमा भने राप्रपाका उम्मेदवार मदनदास श्रेष्ठलाई मत माग्नु भएको छ ।

सामाजिक संञ्जालमा श्रेष्ठको फोटो राख्दै आचार्यले लेख्नुभएको छ राजधानीबासीलाई मदनदास जस्तो असल र सरल मेयर आबश्यक छ बिबेक प्रयोग गरौ ।

आचार्यले लेख्नुभएको छ –

बिगतमा ३ दशक अघि प्रख्यात रेडियो नाटकका हस्ती हुनुहुन्थ्यो मदनदास श्रेष्ठ ! नयाँ पुस्ताका लागि यो नाम नौलो लाग्नसक्छ, तर युवाहरुको आकाँक्षा बुझेका मदनदास श्रेष्ठको सर्वप्रिय गुण हो- उहाँ एक असल र सरल व्यक्ति हुनुहुन्छ !

दूरगामी र दिगो विकासको सोँच राख्ने मदनदास जी सामाजिक रूपान्तरणका लागि काठमाडौ महानगरपालिकामा मेयर बन्न सके देशभरीकै मेयरहरुका लागि समेत ‘रोलमोडेल ‘हुनुहुने निश्चित छ ।

उहाँको हालैको एक टेलिभिजन अन्तरवार्तामा काठमाडौं महानगरवासीको आवश्यकता र आकाँक्षा उहाँले प्रष्ट रूपमा बुझ्नु भएको मात्र होइन, सुशासन, विकास र समृद्धीका आफ्ना योजनाहरु जनताले बुझ्ने भाषामा राख्नु भएको मलाई अनुभूति भयो । त्यतिमात्र नभई, अनुभवले निख्खारिएका मदनदास श्रेष्ठलाई मेयर भएपछि के काम गर्नु हुँदैन, त्यो जनआकाँक्षा विपरित हुन्छु भन्ने पनि प्रष्ट थाहा रहेछ ।

भ्रष्टाचाररहित का.म.न.पा बनाउने उहाँको मूल एजेण्डा रहेछ । प्रत्येक ६/६ महिनामा वार्डहरुमा, अझ टोल टोलमा सर्वसाधारणको खुला भेला (open meeting) गराएर टोल-टोलमै जनताबाटै योजना तर्जूमा (planning) गराउने र जनताबाटै योजना कार्यान्वयनको सार्वजनिक लेखापरीक्षण (public audit) गराउने उहाँको सोँचले सार्थकता पाएमा काठमाडौ महानगरपालिकाको कायकल्प हुन सक्छ ! तर मतदाताको सोँच के छ ? राजधानीबासीलाई मदनदास जस्तो असल र सरल मेयर चाहिएको हो कि ‘आइरन फिस्टेड’ (अरुको कुरा नसुन्ने बज्र जस्तो) मेयर चाहिएको हो, बैशाख ३० गतेले नै तय गर्ला !