काठमाडौँ । प्रधानन्यायाधीश चोलेन्द्रशम्शेर राणाविरुद्धको महाअभियोग प्रतिनिधिसभाको बैठकमा पेस गर्ने तयारी गरिएको छ । यसका लागि महाअभियोग सिफारिस समिति गठन गर्ने प्रयास भइरहेको छ । कानून, न्याय तथा संसदीय मामिलामन्त्री दिलेन्द्रप्रसाद बडूले महाअभियोग प्रस्ताव चाँडोभन्दा चाँडो निष्कर्षमा पुग्नुपर्ने भन्दै सभामुखले महाअभियोग सिफारिस समिति गठन गर्ने प्रयास गरिरहनुभएको जानकारी दिनुभयो ।
उहाँले संसद् नियमावलीकै व्यवस्थाअनुसार महाअभियोग अगाडि बढ्ने बताउनुभयो । “हाम्रो नियमावलीले प्रस्ताव दर्ता भइसकेपछि सात दिनपछिको कुनै बैठकमा राख्ने व्यवस्था गरेको छ । त्यसपछि थप प्रक्रिया सुरु हुन्छ । सम्भवतः अबको प्रतिनिधिसभा बैठकमा प्रस्ताव जान्छ होला”, उहाँले भन्नुभयो ।
नियमावलीमा महाअभियोग समिति ११ सदस्यीय हुने व्यवस्था छ । मन्त्री बडूले महाअभियोग सिफारिस समितिमा सबै दलको प्रतिनिधित्व होस् भन्ने ढङ्गले राजनीतिक नेतृत्व तहमा छलफल भइरहेको जानकारी दिनुभयो । सत्ता साझेदार दल नेपाली कांग्रेस, नेकपा (माअोवादी केन्द्र) र नेकपा (एकीकृत समाजवादी)का ९८ जना सांसदहरुले प्रधानन्यायाधीश राणाविरुद्ध गत फागुन १ गते महाअभियोग दर्ता गराएका थिए ।
