काठमाडौं, भदौ १० । साफ यु–१९ च्याम्पियनसिप फुटबलमा विहीबार (आज) सेमिफाइनल खेल हुँदैछन् ।
ललितपुरको सातदोबाटोस्थित एन्फा टेक्निकल सेन्टरमा हुने पहिलो सेमिफाइनलमा नेपालले अफगानिस्तानको सामना गर्दैछ । खेल दिउँसो साढे १२ बजेपछि सुरु हुनेछ ।
उपाधि जित्ने लक्ष्यमा रहेको नेपालका लागि अफगानस्तिानको चुनौती सहज भने हुने छैन । घरेलु मैदानमा नेपाल समूह ‘ए’को विजेताको रुपमा सेमिफाइनलमा पुगेको हो भने अफगानिस्तान समूह ‘बी’को उपविजेता हुँदै सेमिफाइनल यात्रा तय गरेको हो ।
नेपालले समूहमा भुटान र बंगलादेशलाई हराएको थियो । अफगानिस्तानले भने माल्दिभ्सलाई हराउँदा भारतसँग पराजित भएको थियो ।
६ टोली सहभागी प्रतियोगितामा भुटान र माल्दिभ्स समूह चरणबाटै घर फर्किएका थिए । विहीबारै हुने दोस्रो सेमिफाइनलमा भारत र बंगलादेश भिड्ने छन् ।
