नेपाली काँग्रेसमा गुटबन्दी झनै बढ्दै गएको छ । केही दिनयता देखि देउवा र पौडेल पक्षका नेताहरु विभिन्न नेताहरुका घरमा बस्ने र खाना खाने क्रम बढ्दै गएको छ । गत महिना सुजाता कोइरालाको घरमा दुई पटकसम्म कोइराला पक्षीय नेताहरुको भेटघाट र दिवाभोज भएको थियो । त्यसमा रामचन्द्र पौडेल भने थिएनन् । यस पटक भने पौडेल पक्षीय भनिएका नेताहरुको खानपिन पौडेल निवासमा नभएर नेता प्रकाशमान सिंहको घरमा बसेको छ । सो बैठकले शेरबहादुर देउवा पक्षका विरुद्धमा आगामी महासमिति बैठकमा धक्का दिने रणनीति बनाएको बताइएको छ । सो भेलामा भएका भनिएका निर्णयहरुका बारेमा भने केही आएको छैन । महासमिति बैठकमा पेश हुने संशोधित विधानका विषयमा धारणा बनाउन उनीहरु छलफलमा जुटेका हुन् । पूर्वमहामन्त्री प्रकाशमान सिंहको निवासमा बसेको बैठकमा वरिष्ठ नेता रामचन्द्र पौडेल, महामन्त्री शशांक कोइराला, कोषाध्यक्ष सीतादेवी यादव, नेताहरु डा. शेखर कोइराला, अर्जुन नरसिंह केसी, डा. मिनेन्द्र रिजाल, गगन थापा, चन्द्र भण्डारी, नवीन्द्रराज जोशी, कमला पन्तलगायत नेताहरु सहभागी थिए ।
