काठमाडौँ : यसअघि ‘प्रारम्भ बालप्रतिभा पुरस्कार’ को नामबाट प्रदान गरिँदै आएको र यस वर्षबाट ‘पराक्रम बालप्रतिभा पुरस्कार’ नामाकरण गरिएको बालप्रतिभा पुरस्कार यस वर्ष सर्जक दर्शन केसीलाई प्रदान गर्ने निर्णय गरिएको छ ।
साहित्यकार महेश पौड्यालद्वारा स्थापित सो पुरस्कारलाई उहाँका दिवङ्गत छोरा प्रारम्भ पौड्यालको स्मृतिमा पुनः नामाकरण गरिएको हो ।
काठमाडौँमा शुक्रबार बसेको बालसाहित्य प्रतिष्ठान नेपाल कार्यसमितिको बैठकले सुस्त मनस्थिति र विशेष शारीरिक अवस्थामा हिँड्डुल गर्न र बोल्न नसक्ने अवस्थामा रहेर पनि साहित्य सिर्जनामा सक्रिय रहेका कवि दर्शन केसीलाई वर्ष २०७५ का लागि सो प्रदान गर्ने निर्णय गरेको हो ।
पुरस्कार रू १० हजार नगद र कदरपत्र रहेको छ । पुरस्कार यही पुस १५ गते स्व पौड्यालको जन्मदिनमा वितरण गरिनेछ ।
