काठमाडौँ । कम्पनी रजिष्ट्रारको कार्यालय त्रिपुरेश्वर, काठमाडौंमा सहायक रजिष्ट्रार पदमा कार्यरत गीता कुमारी पन्थी विरुद्ध आज विशेष अदालत काठमाडौंमा आरोप–पत्र दायर गरिएको छ ।
पन्थीले काठमाडौंमा दर्ता रहेको बोर्डिङ स्कुलको हालसम्म बाँकी रहेको कर तिर्न जाँदा राजश्व रकम कम गरिदिने बहानामा सेवाग्राहीसँग घुस रकम माग गरिरहेको भन्ने सूचना आधारमा अख्तियार दुरुपयोग अनुसन्धान आयोगको कार्यालय टङ्गालबाट खटिई टोलीले पक्राउ गरेको थियो ।
पन्थीले सेवाग्राहीसँग रू.१,००,००० घुसबापतको रकम लिइसकेको अवस्थामा नियन्त्रणमा लिईएको थियो ।
पन्थीले भ्रष्टाचार निवारण ऐन, २०५९ को दफा ३ को उपदफा (१) बमोजिम कसुर गरेको पुष्टि हुन आएकोले निजलाई बिगो रू.१,००,००० कायम गरी भ्रष्टाचार निवारण ऐन, २०५९ को दफा ३ को उप दफा (१) र दफा ३ को उपदफा (१) को खण्ड (ग) बमोजिम जरिवाना र कैद सजाय हुन मागदाबी लिई आरोप पत्र दायर गरिएको हो ।
