काठमाडौँ । राष्ट्रियसभाका सांसद राधेश्याम अधिकारीले मुलुकमा युद्धको डरलाग्दो स्थिति दोहोरिन लाग्दा पनि सरकार ख्याल ठ्ट्टा गरेर बसिरहेको आरोप लगाएका छन् ।
सोमबार राष्ट्रियसभाको बैठकमा बोल्दै उनले नेत्रविक्रम चन्द विप्लव नेतृत्वको नेपाल कम्युनिस्ट पार्टीका कारण शान्ति सुरक्षामाथि गम्भीर प्रश्न उठे पनि सरकारले भने गम्भीरतापूर्वक नलिई समस्या बल्झाउन लागिरहेको बताए ।
विप्लवको पार्टीप्रति प्रधानमन्त्री केपी शर्मा ओलीले गरेको टिप्पणीले पनि समस्या चर्काउन खोजेको आरोप लगाए । ‘प्रधानमन्त्रीले लोकतन्त्रको नाममा आशु बगाउनेहरु किन विप्लवपट्टि लागेका भनिरहनुभएको छ ।
मुलुक दशवर्षको जनयुद्धले थलिएको अवस्थामा शान्ति सम्झौताको १२ बुँदे सहमतिमा नेत्रविक्रम चन्दको पनि संलग्नता भएको हुँदा सो सम्झौताको पालना चन्दले पनि गर्नुपर्ने उनको भनाइ थियो ।
सांसद अधिकारीले द्वन्द्वका कारण नेपाली जनताले फेरि दुःख पाउने उल्लेख गर्दै सरकारले शान्ति सुरक्षा कायम गर्नका लागि राजनीतिक रुपमै समाधान खोज्नुपर्नेमा जोड दिए ।
