लाहान । डाक्टर सिके राउत नेतृत्वको नव गठित जनमत पार्टीका कार्यकताहरुले आज लाहानमा प्रर्दशन गरेको छ । सरकारसँग गरेको ११ बुँदे सम्झौताले आफ्नो ऐतिहासिक जित भएको भन्दै आज प्रर्दशन गरेको हो ।
प्रदर्शनका क्रममा डा. राउतले लहानस्थित मधेस आन्दोलनका शहिद रमेश महतोलगायतको शालिकमा माल्यार्पण गरेका छन् ।
सरकारले सिके राउतसँग फागुन २४ गते ११ बुँदे सम्झौता हस्ताक्षर गरेको थियो । उक्त सम्झौतमा गठबन्धनका कार्यकर्ताहरुमाथि लागेको मुद्दा फिर्ता लिने राउत पक्षले संघीय लोकतान्त्रिक गणतन्त्र स्वीकार्दै स्वतन्त्र राजनीति गर्ने तथा स्वतन्त्रता, स्वाधिनता र अखण्डतको रक्षा गर्ने प्रतिवद्धता जनाइएको छ ।
त्यस्तै सरकारले स्वतन्त्र मधेस गठबन्धनका नेता कार्यकर्तामाथि लगाएका राजनीतिक मुद्दा खारेज गर्ने र उसलाई मुलधारको राजनीति गर्न अवरोध नगर्ने उल्लेख छ । त्यस्तै प्रहरी हिरासतमा मृत्यु भएका गठबन्धका कार्यकर्ताका परिवारालाई क्षतीपुर्ति दिने, गठबन्धनका नेता कार्यकर्ताको ज्ञान र सीप राज्यका लागि लगाउने सहमतिमा उल्लेख छ ।
प्रधानमन्त्री केपी शर्मा ओलीको उपस्थितिमा गृहमन्त्री रामबहादुर थापा बादल र राउतले सहमति पत्रमा हस्ताक्षर गरेका थिए ।
