काठमाडौं । इण्डियन प्रिमियर लिगमा आइतबार राती भएको खेलमा मुम्बई इण्डियन्स बिजयी भएको छ । मुम्बई इण्डियन्स बिजयी भएसंगै कोलकाता नाइट राइडर्स ‘प्लेअफ’बाट बाहिरिएको हो।
मुम्बईले कोलकोतालाई २३ बल बाँकी छँदा ९ विकेटको फराकिलो अन्तरले पराजित गर्यो। यस हारले सनराइजर्स हैदराबाद रनरेटका आधारमा ‘प्लेअफ’मा पुगेको छ।
यस्तै जितसँगै मुम्बई लिगको शीर्ष दुईमा पुगेको छ।
अनिवार्य जितको लक्ष्यका साथ मैदानमा उत्रेको कोलकाताले पहिले ब्याटिङ गर्दै सात विकेटको नोक्सानीमा १३३ मात्र बनाउन सक्यो। त्यसपछि १३४ रनको जवाफी लक्ष्य पछ्याउन आएको मुम्बईले सो लक्ष्य मात्र एक विकेटको क्षतिमा १६.१ ओभरमा हासिल गर्यो।
मुम्बईका लागि रोहित शर्माले ४८ बलमा अविजित ५५ रन जोडे, यस क्रममा उनले ८ चौका प्रहार गरे। यस्तै क्वीटनले २३ बलमा ३० रन जोडे भने सूर्यकुमार यादवले नटआउट ४६ रन जोडे।
हिजोको खेलमा कोलकोतालाई आन्द्रे रसेल खराब प्रदर्शन र रोविन उथप्पाको सुस्त ब्याटिङ महँगो पर्यो। कोलकातालाई २९ बलमा ४१ रन जोड्दै क्रिस लिनले राम्रो सुरूवात दिलाएका थिए भने उथप्पाले ४७ बलमा ४० रन बनाएर सुस्त खेले।
यी दुईका अलावा नितिश राणाले १३ बलमा २६ रन जोड्नु बाहेक कोलकाताका कुनै पनि ब्याट्सम्यानले दोहोरो अंकमा रन जोड्न सकेनन।
मुम्बईका लागि लसिथ मलिंगाले ३ विकेट लिए भने हार्दिक पाड्या र जसप्रीत बुमराहले समान २-२ विकेट लिए।
