जनकपुरधाम। असारको अन्तिम साता आएको बाढीबाट प्रभावित धनुषाको पूर्वी क्षेत्रका स्थानीयवासी अहिले पनि त्यो पीडाबाट बाहिर निस्कन सकेका छैन् ।
असार २७ र २८ गते भएको अविरल वर्षापछि कमला नदीमा बाढी आएपछि बाँध भत्काए पछि त्यहाँका स्थानीयवासी प्रभावित भए । बाढीबाट धनुषाको पूर्वी क्षेत्रमा पर्ने फुलवरिया र मल्हनिया सबैभन्दा बढी प्रभावित भएको छ ।
मल्हनिया र फुलवरियाको बीचमा बाढीका कारण बाँध नै भत्किएपछि यी दुई गाउँबिचको सम्पर्क नै टुटेको छ । त्यहाँ कमलाको बाँध दुई सय मिटरसम्म बाढीले बगाएको छ । बाँध भत्किएपछि स्थानीयवासी गन्तव्यसम्म पुग्नका लागि ४ फिटसम्म पानी तर्न बाध्य भएका छन् ।
बाढीपछि गर्नु पर्ने पुनर्निमाणका कार्यहरू सुरु हुन नसक्दा धनुषाको जनकनन्दनी गाउँपालिकाको इनरवा, फुलवरिया र मल्हनियाका सयौं व्यक्तिहरू अझै प्रभावित छन् । त्यहाँ कुनै पनि सवारी साधान पुग्न सकेका छैनन् भने स्थानीय जोखिम पूर्ण यात्रा गर्न बाध्य छन् । जनकनन्दनी गाउँपालिकाका चन्देश्वर यादवको कमला किनारमा चार विघा जग्गा थियो, जुन अहिले डुबानमा परेको छ । बाढीका कारण उनले चार बिघामा लगाएको सबै धान बगाएको छ । उनले अहिले त्यहाँ बालुवा मात्रै रहेको बताए ।
जनकनन्दनी गाउँपालिकाको इनरवामा ६५ घर पूर्णरूपमा विस्थापित भइसकेका छन् । तर, अहिलेसम्म सरकारीस्तरबाट पुनस्थापनाका लागि कुनै प्रकारको पहल नभएको स्थानीयको आरोप छ ।
स्थानीय ४८ वर्षीय अमोद मडिक यादव भन्छन्, ‘२ सय बीघा जमिन नै बाढीले बगायो । खेत भरी बालुवा, गिटी र ढुंगा मात्र छ ।’‘इनरवा र मल्हनियाको सडकमा अझै पानी र हिलो जमेको छ । हिड्ने ठाउँ छैन ।’ अमोदले भने, ‘बाढीको प्रकोपले सबैभन्दा बढी वृद्धवृद्धा र बालबालिका प्रभावित
भएका छन् ।’ उनले यस क्षेत्रको मुख्य बजार सिरहा जोड्ने हुलाकी सडक पनि चारस्थानमा भत्किएको छ यसले गर्दा आवतजावतमा समस्या भएको बताए ।
एक प्रश्नमा स्थानीय जनकनन्दनी एकका ३९ वर्षीय फुलबारिया बस्ने जगदेव यादव भन्छन्, ‘स्थानीय सरकार बने पनि टोलमा कुनै विकास भएको छैन । सडक ग्राबेल गर्ने कुरा त परै जाओस् । आजसम्म माटो त हालिएको छैन । अझै पिचको त कुरा नगरौं । प्रत्येक वर्ष वर्षा भएपछि सडक हिंडिनसक्नु हुन्छ, तर सरकार भने कानमा रुई हालेर सुतेको हुन्छ ।
उता स्थानीय प्रशासनले भने राहत पुगेको दाबी गर्दै आइरहेको छ जबकि वास्तविकता अर्कै रहेको छ । प्रशासनले दाबी गरे अनुसार राहत सामग्री लिएर कोही नआएको स्थानीयको गुनासो रहेको समाचार राजधानी दैनिकमा प्रकाशित छ ।
