काठमाडौं । गृहमन्त्री सुधन गुरुङ तीनदिने भारत भ्रमण सकेर आज (बुधबार) साँझ ७ बजे नेपाल फर्किने भएका छन्।
गृहमन्त्री गुरुङ बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) सदस्य राष्ट्रका गृहमन्त्रीहरूको पहिलो बैठकमा सहभागी हुन असोज २६ गते भारतको नयाँदिल्ली गएका थिए। गृहमन्त्री बनेपछि उनको यो पहिलो औपचारिक विदेश भ्रमण हो।
असोज २७ गते भएको बैठकमा क्षेत्रीय सुरक्षा सहकार्यका विषयमा छलफल भएको थियो। भ्रमणका क्रममा गृहमन्त्री गुरुङले भारतीय गृहमन्त्री अमित शाहसँग द्विपक्षीय भेटवार्ता गरेका थिए। भेटमा नेपाल र भारतबीच साझा सुरक्षा चुनौतीमा समन्वय तथा सहकार्य सुदृढ गर्ने विषयमा छलफल भएको थियो।
त्यस अवसरमा गुरुङले भारतीय बजारमा नेपाली उद्योगी तथा व्यवसायीले भोग्दै आएको भारतीय मानक ब्युरो (बीआईएस) प्रमाणीकरणसम्बन्धी प्राविधिक समस्या समाधान गर्न पनि आग्रह गरेका थिए। उक्त विषयमा भारतीय पक्षबाट सकारात्मक प्रतिक्रिया प्राप्त भएको गृह मन्त्रालयले जनाएको छ।
