काठमाडौं । खाद्य प्रविधि तथा गुण नियन्त्रण विभागले काठमाडौंको महाराजगञ्जमा रहेके मन्त्र थकालीलाई भान्छामा चरम फोहोर र अखाद्य कैफियत भेटिएपछि दुई लाख ५० हजार रुपैयाँ जरिवाना गरेको छ ।
खानाभित्र किरा परेको भन्दै उपभोक्ताले फोनमार्फत गुनासो गरेलगत्तै खाद्य प्रविधि तथा गुण नियन्त्रण विभागको ‘र्यापिड रेस्पोन्स टिम’ (आरआरटी) र वाणिज्य, आपूर्ति तथा उपभोक्ता संरक्षण विभागको संयुक्त टोलीले रेस्टुरेन्टमा आकस्मिक अनुगमन गरेको थियो।
अनुगमनका क्रममा भान्छा र फ्रिजभित्रै सांग्ला तथा भुसुना भेटिनुका साथै पकाइएको खाद्यपदार्थसमेत नछोपी असुरक्षित रूपमा भण्डारण गरिएको पाइएको बिभागले जनाएको छ ।
यस्तै, भान्छाको डस्टबिन खुला र फोहोर रहेको, ड्रेनेज सफा नगरिएको तथा मसीयुक्त पत्रिकाको कागजमा करिब १ किलो फ्राइड आलु राखिएको फेला परेको विभागले जनाएको छ।
विभागले पकाएको खाना छोपेर राख्न, किट नियन्त्रण प्रभावकारी बनाउन र मसीजन्य कागजको प्रयोग नगर्न निर्देशन दिएको छ।
औंल्याइएका कैफियतहरू ७ दिनभित्र सुधार गरी प्रमाणसहित विभागमा उपस्थित हुन आदेश दिइएको छ। तोकिएको समयमा सुधार नगरे ‘खाद्य स्वच्छता तथा गुणस्तर ऐन, २०८१’ बमोजिम थप कारबाही गरिने चेतावनी दिइएको छ।
