काठमाडौं । ‘सीप र रोजगारी : साझा जिम्मेवारी’ भन्ने मूल नारासहित सञ्चालन भइरहेको सीप तथा रोजगार मेलाअन्तर्गत युवालाई स्थानीय तहमै पुगेर रोजगारीका अवसरसँग जोड्ने कार्यक्रम अघि बढाइएको छ ।
युवा, श्रम तथा रोजगार मन्त्रालय र अरियन्ट कम्पनीको मानव संसाधन विभागका प्रमुखसहितको टोलीले कोशी प्रदेशका विभिन्न जिल्ला तथा स्थानीय तहमा पुगेर स्थानीय युवालाई रोजगारीमा जोड्ने उद्देश्यले कार्यक्रम सञ्चालन गरेको हो ।
मेलामा सहभागी हुन चाहने देवानगञ्ज, बर्जु, इनरुवा, रंगेलीलगायत ग्रामीण क्षेत्रका युवालाई इटहरीमा सञ्चालन भइरहेको सीप तथा रोजगार मेला स्थलसम्म पुग्नसमेत सहजीकरण गरिएको छ । स्थानीय तहसम्मै पुगेर युवाको सीप, रुचि र रोजगारीको अवसरबीच समन्वय गराउने उद्देश्यले कार्यक्रम सञ्चालन गरिएको आयोजकले जनाएको छ ।
युवा, श्रम तथा रोजगार मन्त्रालयको आयोजनामा कोशी प्रदेशको इटहरीस्थित सोल्टी वेस्टेड होटलको प्राङ्गणमा असोज १४ गतेदेखि २० गतेसम्म सीप तथा रोजगार मेला सञ्चालन भइरहेको छ । मेलामार्फत सीप सिक्न चाहने तथा रोजगारीको खोजीमा रहेका युवालाई रोजगारदाता र विभिन्न सीपमूलक अवसरसँग प्रत्यक्ष जोड्ने प्रयास गरिएको छ ।
