काठमाडौं । नेकपा (एमाले) का प्रमुख सचेतक ऐन महरले वर्तमान सरकारको ६ महिनाको कार्यकाल पूर्णतः असफल भएको टिप्पणी गर्नुभएको छ।
मंगलबार संसद् परिसरमा सञ्चारकर्मीसँग कुरा गर्दै महरले सरकार सुशासन र जनउत्तरदायी भूमिका निर्वाह गर्नुको सट्टा संविधान र लोकतान्त्रिक संस्थाप्रति पूर्वाग्रही बनेको आरोप लगाउनुभयो।
सरकार गठन हुँदा जनतामा देखिएको उत्साह र आशा अहिले निराशामा परिणत भएको उहाँको भनाइ थियो। युवा तथा नयाँ अनुहारको सरकारबाट आर्थिक तथा सामाजिक रूपान्तरण हुने अपेक्षा गरिए पनि सरकार ‘स्टन्ट’ र सस्तो लोकप्रियतामा केन्द्रित भएको उहाँले टिप्पणी गर्नुभयो।
महरले चुनावअघि गरिएका प्रतिबद्धता र सरकारले सार्वजनिक गरेको १०० दिने कार्यसूची कार्यान्वयन हुन नसकेको आरोप लगाउनुभयो। विदेशमा रहेका युवालाई स्वदेश फर्काउने तथा निःशुल्क शिक्षा र स्वास्थ्यको नारा दिएको सरकारले अहिले आफ्ना विरोधीलाई प्रतिशोधका आधारमा थुन्ने काम गरिरहेको उहाँको दाबी थियो।
उहाँले सरकारको कार्यशैली पञ्चायती शैलीको पुनरावृत्तिजस्तो देखिन थालेको बताउनुभयो। विपद्का समयमा समेत समन्वयकारी भूमिका निर्वाह गर्न नसकेको भन्दै उहाँले प्रधानमन्त्री र मन्त्रीहरूबाट दम्भ र अहङ्कारपूर्ण अभिव्यक्ति आएको आरोप लगाउनुभयो।
पुनःस्थापनाको काममा राज्य संयन्त्र अस्तव्यस्त बनेको दाबी गर्दै महरले भन्नुभयो, “सरकार टाउकोले टेकेर उल्टो दिशामा हिँडिरहेको छ, त्यसैले यसलाई कुनै नम्बर दिन सकिँदैन।”
महरले सरकारले लोकतान्त्रिक संस्था, विद्यार्थी संगठन र कर्मचारी संयन्त्रमाथि समेत प्रहार गरिरहेको आरोप लगाउनुभयो। कानुनी राज्यको मर्मविपरीत विना अभियोग र प्रमाण व्यक्तिलाई पक्राउ गर्ने तथा थुन्ने काम भइरहेको भन्दै उहाँले सरकारको कार्यशैली स्वेच्छाचारी र निरङ्कुश भएको जिकिर गर्नुभयो।
