काठमाडौं । नेकपा (एमाले) का केन्द्रीय सदस्य सूर्य थापाले पार्टीभित्रको नेतृत्व विवाद र गुटगत ध्रुवीकरण अन्त्य गर्दै आगामी निर्वाचनमा एमाले एकढिक्का भएर जानुपर्ने बताएका छन्।
तीन दिनदेखि जारी एमाले केन्द्रीय कमिटी बैठकमा धारणा राख्दै थापाले राष्ट्रिय कार्यभार र निर्वाचनको तयारीमा केन्द्रित हुनुपर्ने समयमा पार्टी आन्तरिक विवादमा अल्झिन नहुने बताए।
अध्यक्ष केपी शर्मा ओलीले प्रस्तुत गरेको राजनीतिक प्रतिवेदन आत्मसमीक्षामा आधारित र पार्टी पुनर्जागरणमा केन्द्रित रहेको भन्दै उनले प्रतिवेदनको स्वागत गरे।
थापाले निर्वाचनमा पार्टीले व्यहोरेको पराजयको सम्पूर्ण जिम्मेवारी अध्यक्षमाथि मात्रै थोपर्न नहुने धारणा राखे। महाधिवेशनमा प्यानल बनाएर नेतृत्व चयन गरिएको अभ्यासको असर निर्वाचन परिणाममा समेत देखिएको भन्दै उनले त्यसको जिम्मेवारी सामूहिक रूपमा लिनुपर्ने बताए।
उनले अध्यक्ष ओलीको नेतृत्वमा जनतामाझ जान नसकिने भन्ने भाष्य निर्माण गरेर पार्टीलाई कमजोर पार्न नहुने बताए। नेतृत्व परिवर्तनलाई मात्रै पार्टीका सबै समस्याको समाधानका रूपमा प्रस्तुत गर्न नहुने उल्लेख गर्दै उनले दुई कार्यकाल र ७० वर्षे उमेरहदलाई पनि ‘रामबाण उपचार’ का रूपमा बुझ्न नहुने बताए।
नेतृत्व निर्माण, पुस्तान्तरण र जिम्मेवारी हस्तान्तरणका विषय राजनीतिक प्रतिवेदनमा स्पष्ट रूपमा समेटिएको उनको भनाइ थियो।
थापाले पार्टीको पराजयको कारण खोज्न गठित कार्यदल पात्र खोज्ने दिशामा बढी केन्द्रित भएको टिप्पणी गरे। पार्टी किन पराजित भयो भन्ने वस्तुगत कारण पहिचान गर्नुपर्नेमा को जिम्मेवार हो भन्ने बहसमा मात्रै केन्द्रित हुन नहुने उनले बताए।
पार्टीभित्रको गुटगत ध्रुवीकरण लुम्बिनी प्रदेशको पहिलो अधिवेशनदेखि तीव्र बनेको उल्लेख गर्दै थापाले प्यानल संस्कृति र विभाजनकारी प्रवृत्तिबाट पार्टीले शिक्षा लिनुपर्ने बताए। आन्तरिक विभाजनका साथ निर्वाचनमा सफलता हासिल गर्न नसकिने भन्दै उनले एमाले एकताबद्ध भएर चुनावी मैदानमा जानुपर्नेमा जोड दिए।
अध्यक्षले मार्गप्रशस्त गर्नुपर्ने विषय पार्टीका विभिन्न तहका बैठक तथा ११औँ महाधिवेशनबाट अस्वीकृत भइसकेको दाबी गर्दै थापाले त्यसलाई निरन्तर सार्वजनिक बहसको विषय बनाउन नहुने बताए। पार्टीलाई अन्त्यहीन बहसको ‘डिबेट क्लब’ बनाउन नहुने भन्दै उनले महाधिवेशनका निर्णय र पार्टी विधि सबैका लागि बाध्यकारी हुनुपर्ने बताए।
काठमाडौं महानगर प्रमुख बालेन्द्र शाह नेतृत्वको स्थानीय सरकारले अध्यक्ष ओलीमाथि गरेको व्यवहारलाई व्यक्तिगत विषयका रूपमा नभई पार्टी नेतृत्वमाथिको आक्रमणका रूपमा बुझ्नुपर्ने धारणा पनि थापाले राखे। उक्त विषयमा पार्टीभित्र एकीकृत दृष्टिकोण बन्न नसक्नु कमजोरी भएको उनको भनाइ थियो।
भदौ २३ र २४ गतेका घटनाबारे पनि पार्टीले साझा दृष्टिकोण बनाउनुपर्ने थापाले बताए। उपलब्ध तथ्य तथा प्रमाण, विभिन्न आयोगका प्रतिवेदन, ग्रेजोनको खुलासा र मानवअधिकारसम्बन्धी अध्ययनको विश्लेषण गर्दै सत्यतथ्य अभिलेखीकरणका लागि निष्पक्ष नागरिक छानबिनको पहल गर्नुपर्ने उनले बताए।
अध्यक्ष ओली तथा उपाध्यक्ष–महासचिवबीच पछिल्लो समय देखिएको सम्बन्धको तिक्तताले पार्टीपंक्तिमा निराशा बढाएको उल्लेख गर्दै थापाले नेतृत्व तहबीच पुनः विश्वास र सहकार्यको वातावरण निर्माण गर्न आग्रह गरे। केही महिनाअघि व्यक्त गरिएको सहकार्यको प्रतिबद्धतालाई व्यवहारमै कार्यान्वयन गर्नुपर्ने उनको भनाइ थियो।
थापाले पार्टी र नेतृत्वविरुद्ध फैलाइएका कुप्रचारको प्रतिवाद गर्न कार्यकर्तालाई आह्वान गर्दै सरकारका संविधानविरोधी तथा जनविरोधी गतिविधिविरुद्ध सशक्त रूपमा आवाज उठाउनुपर्ने बताए। आत्मनिन्दा, गुनासो र विभाजनमा ऊर्जा खर्च नगरी पार्टीलाई थप एकताबद्ध र क्रियाशील बनाउँदै असफलताबाट सफलतातर्फ अघि बढ्नुपर्नेमा उनले जोड दिए।
