काठमाडौं । नेकपा (एमाले) का केन्द्रीय सदस्य रमेश बडालले पार्टीलाई पुनः सक्रिय र एकताबद्ध बनाउँदै सरकारका गलत कामविरुद्ध सशक्त रूपमा प्रस्तुत हुनुपर्ने बताएका छन्।
तीन दिनदेखि जारी एमाले केन्द्रीय कमिटी बैठकमा धारणा राख्दै बडालले अध्यक्ष केपी शर्मा ओलीले प्रस्तुत गरेको राजनीतिक दृष्टिकोणलाई आधारभूत रूपमा समर्थन गर्दै वर्तमान राजनीतिक परिस्थिति चुनौतीपूर्ण बन्दै गएको बताएका हुन्।
उनले जनस्तरमा बढ्दै गएको निराशाको प्रभाव पार्टी पंक्तिमा समेत परेको उल्लेख गर्दै संगठनलाई पुनः सक्रिय बनाउँदै जनतासँगको संवादलाई सशक्त बनाउनुपर्नेमा जोड दिए। पार्टीका सबै तहका कमिटीलाई प्रभावकारी रूपमा क्रियाशील बनाएर एमालेविरुद्ध फैलाइएका भ्रम चिर्न र वास्तविक तथ्य जनतासम्म पुर्याउनुपर्ने उनको भनाइ थियो।
बडालले वर्तमान सरकारका गतिविधिबारे जनतालाई जानकारी गराउँदै निराश कार्यकर्ता र आम नागरिकमा आशावादिता जगाउने अभियान सञ्चालन गर्नुपर्ने बताए। त्यसका लागि पार्टीको संगठनात्मक संरचनालाई थप चुस्त र प्रभावकारी बनाउनुपर्ने उनले धारणा राखे।
सरकारविरुद्ध राजनीतिक अभियान सञ्चालन गर्दा एमालेमाथि थप राजनीतिक तथा वैचारिक आक्रमण हुन सक्ने भन्दै बडालले पार्टीले त्यसका लागि पूर्वतयारी गर्नुपर्ने बताए। चुनावपछि अध्यक्ष ओलीमाथि केन्द्रित आक्रमण क्रमशः सिंगो पार्टीविरुद्ध लक्षित हुन सक्ने उनको दाबी थियो।
उनले नेता–कार्यकर्तामाथि विभिन्न प्रकारका दबाब सिर्जना गर्ने, मुद्दा लगाउने तथा पार्टीविरुद्ध विभिन्न शक्तिहरू सक्रिय हुन सक्ने सम्भावनासमेत औंल्याए।
बडालले पार्टीभित्रै रहेर पार्टीविरुद्ध गतिविधि गर्ने व्यक्तिहरूबाट समेत चुनौती आउन सक्ने बताए। केन्द्रीय कमिटीले एकताबद्ध निर्णय सार्वजनिक गरेपछि त्यसलाई कमजोर पार्ने प्रयास हुन सक्ने भन्दै उनले पार्टी नेतृत्व सचेत रहनुपर्ने धारणा राखे।
सञ्चारमाध्यम तथा सामाजिक सञ्जालमार्फत एमालेविरुद्धको अभियान थप तीव्र हुन सक्ने अवस्था रहेको उल्लेख गर्दै उनले त्यसको सामना गर्न पार्टीले राजनीतिक, वैचारिक र संगठनात्मक रूपमा तयारी गर्नुपर्ने बताए।
अध्यक्ष ओलीले प्रस्तुत गरेको राजनीतिक दृष्टिकोणमा यस्ता सम्भावित चुनौतीको सामना गर्न पार्टीले अपनाउने पूर्वतयारी र रणनीतिलाई समेत स्पष्ट रूपमा समेट्नुपर्ने सुझाव बडालले दिएका छन्।
