काठमाडौं । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानबहादुर शाहीले जेन–जी आन्दोलनका दोषीलाई कारबाही गर्न सरकार असफल भएको भन्दै प्रश्न उठाउनुभएको छ।
मंगलबार प्रतिनिधि सभा बैठकमा बोल्दै सांसद शाहीले राष्ट्रिय मानव अधिकार आयोगले जेन–जी आन्दोलनमा दोषी देखिएकामाथि कारबाही गर्न सिफारिस गरेको ६ महिना बितिसक्दा पनि उनीहरू पक्राउ नपरेको भन्दै सरकारको ध्यानाकर्षण गराउनुभयो।
उहाँले आन्दोलनमा दोषी देखिएका व्यक्तिहरू सत्तापक्ष वा प्रतिपक्ष जुनसुकै दलसँग सम्बन्धित भए पनि कानुनी कारबाहीको दायरामा ल्याउनुपर्ने बताउनुभयो। दोषीलाई पक्राउ गर्न नसके सरकारको नेतृत्वले सत्तामा बसिरहनुको औचित्य नरहेको उहाँको भनाइ थियो।
“अपराधीलाई आजसम्म किन पक्रिनुभएको छैन ? यदि पक्रिन सक्नुहुन्न भने यो सत्ताको कुर्सीमा किन बसिराख्नुभएको छ ?” उहाँले प्रश्न गर्नुभयो।
सांसद शाहीले भोटेकोशी बाढीका कारण सुरुङमा फसेका नागरिकको उद्धारमा राज्यले चरम ढिलाइ गरेको भन्दै आपत्ति जनाउनुभयो। राज्यसँग पर्याप्त स्रोतसाधन र सुरक्षा जनशक्ति हुँदाहुँदै उद्धारमा सात दिनसम्म ढिलाइ हुँदा बाँच्न सक्ने नागरिकको समेत ज्यान गएको उहाँले बताउनुभयो।
उहाँले यस्तो ढिलाइलाई राज्यबाट भएको ‘हत्या’ को संज्ञा दिँदै नागरिकको जीवनरक्षामा सरकार गम्भीर हुनुपर्ने धारणा राख्नुभयो।
“राज्यसँग खर्बौँको बजेट छ, सुरक्षा जनशक्ति छ। यति धेरै स्रोतसाधन हुँदाहुँदै पनि नागरिकको जीवन बचाउन नसक्नु लज्जास्पद विषय हो,” उहाँले भन्नुभयो।
