काठमाडाैँ । नेकपा (एमाले) का सांसद राजेन्द्रकुमार राईले धनकुटा नगरपालिकास्थित पर्यटकीय क्षेत्र हिले बजारमा लामो समयदेखि रोक्का रहेको जग्गा तत्काल फुकुवा गर्न सरकारसँग माग गर्नुभएको छ।
प्रतिनिधि सभाको मंगलबारको बैठकमा बोल्दै सांसद राईले जग्गा रोक्का हुँदा स्थानीय बासिन्दा तथा व्यवसायीको अर्बौँ रुपैयाँको लगानी जोखिममा परेको बताउनुभयो। उहाँले भूमिसुधार मन्त्रालयमा रोकिएको प्रक्रिया तत्काल अघि बढाउन सरकारको ध्यानाकर्षण गराउनुभयो।
सांसद राईका अनुसार भारत, बंगलादेश, भुटान तथा सिक्किमबाट समेत पर्यटक आउने ऐतिहासिक हिले बजारमा जग्गा रोक्काका कारण आर्थिक गतिविधि सुस्त बन्दै गएको छ।
उहाँले वि.सं. २०६६ मा उत्तरपानी चिया बगान प्रणालीअन्तर्गत रहेको १ हजार १५१ रोपनी जग्गामध्ये १४८ रोपनी मन्त्रालयको निर्णयअनुसार सट्टापट्टा गरी विभिन्न सार्वजनिक संरचना निर्माण तथा स्थानीयलाई लालपुर्जा वितरण गरिएको जानकारी दिनुभयो।
उक्त जग्गामा संघीय सरकारको बजेटबाट खेलमैदान, नगरपालिकाको बजेटबाट बसपार्क, वडा कार्यालयको पहलमा समाधिस्थल र वक्रकुण्ड मन्दिर निर्माण हुनुका साथै २६६ जना स्थानीयले निजी आवास तथा व्यावसायिक भवन निर्माण गरेका छन्।तर अख्तियार दुरुपयोग अनुसन्धान आयोगले वि.सं. २०७१ मा मौखिक रूपमा र २०७५ मा औपचारिक रूपमा उक्त जग्गा रोक्का गरेपछि समस्या उत्पन्न भएको सांसद राईले बताउनुभयो।
स्थानीयवासीले त्यसपछि विशेष अदालतमा मुद्दा दायर गरेको र अदालतले आवश्यक निर्णय गर्ने अधिकार भूमिसुधार मन्त्रालयलाई दिएको उहाँले सदनलाई जानकारी गराउनुभयो।
जग्गा रोक्का भएका कारण स्थानीय व्यवसायीले करिब तीनदेखि चार अर्ब रुपैयाँ लगानी गरेर भौतिक संरचना निर्माण गरे पनि बैंकिङ कारोबार तथा कर्जा लिनबाट वञ्चित हुनुपरेको सांसद राईको भनाइ छ।
पछिल्लो समय जिल्ला समन्वय समितिको नेतृत्वमा मालपोत, नापी, वन कार्यालय र कोष तथा लेखा नियन्त्रक कार्यालयका प्रतिनिधि सम्मिलित समितिले सर्जमिन मुचुल्कासहितको प्रतिवेदन मन्त्रालयमा बुझाइसकेको भए पनि त्यसपछि प्रक्रिया अघि नबढेको भन्दै उहाँले असन्तुष्टि व्यक्त गर्नुभयो।
नयाँ सरकारले सुशासन र द्रुत सेवा प्रवाह गर्ने प्रतिबद्धता जनाएकाले लामो समयदेखि समस्यामा परेका नागरिकको समस्या तत्काल समाधान गर्न सांसद राईले सरकारसँग माग गर्नुभयो।
