काठमाडौं । नेकपा एमालेका अध्यक्ष केपी शर्मा ओलीले जेनजी आन्दोलनपछि नेपालमा बाह्य चासो र चलखेल बढेको दाबी गरेका छन्।
सोमबारदेखि सुरु भएको एमाले केन्द्रीय कमिटी बैठकमा प्रस्तुत राजनीतिक प्रतिवेदनमार्फत ओलीले पछिल्ला घटनाक्रमप्रति यस्तो धारणा सार्वजनिक गरेका हुन्।
ओलीले जेनजी आन्दोलनका क्रममा निजी सम्पत्तिमाथि भएको आगजनी तथा लुटपाटलाई राजनीतिक परिवर्तन वा क्रान्तिको संज्ञा दिन नसकिने उल्लेख गरेका छन्। उनका अनुसार ती घटनामा सत्ता परिवर्तनलाई लक्षित बाह्य रूपमा प्रायोजित रणनीतिको प्रभाव देखिएको छ।
आफ्नो प्रतिवेदनमा ओलीले पछिल्लो समय विभिन्न विदेशी सञ्चारमाध्यममा प्रकाशित तथ्य तथा समाचारले नेपालको आन्तरिक राजनीतिमा भूराजनीतिक स्वार्थ कसरी अभिव्यक्त भए भन्ने विषयलाई थप स्पष्ट पार्दै गएको दाबी गरेका छन्।
उनले आन्दोलनपछि नेपालमा बाह्य चासो र चलखेल बढेको उल्लेख गर्दै नेपालको भूमिबाट छिमेकी मुलुकका संवेदनशीलतामाथि असर पार्ने गतिविधि सरकारकै संरक्षणमा भइरहेको आरोपसमेत लगाएका छन्।
यस्तै, नेपालमा रहेका मूल्यवान खनिज सम्पदासम्बन्धी पछिल्ला संवेदनशील सूचना र समाचारले आम नागरिकमा समेत आशंका बढाएको ओलीको प्रतिवेदनमा उल्लेख छ।
