काठमाडौँ । भोटेकोशी बाढीबाट प्रभावित धादिङ र नुवाकोटका सम्पूर्ण क्षेत्रमा विद्युत सेवा पुनः सुचारू भएको छ । बाढीबाट विद्युत् पूर्वाधारमा क्षति पुगेपछि अवरुद्ध भएको सेवा ऊर्जा, जलस्रोत तथा सिँचाइ मन्त्रालयको पहलमा तीव्र गतिमा पुनःस्थापना गरिएको हो ।
मन्त्रालयका प्रवक्ता मोहनकुमार शाक्यका अनुसार बाढी गएको भोलिपल्टदेखि नै प्रभावित जिल्लामा विद्युत् सेवा पुनःस्थापनाको काम अघि बढाइएको थियो । धादिङमा नुवाकोटभन्दा अगाडि नै सबै क्षेत्रमा विद्युत् सेवा सुचारू गरिएको थियो भने नुवाकोटमा भदौ २४ गते सम्पूर्ण क्षेत्रमा बिजुली पुगेको हो ।
बाढीबाट सबैभन्दा बढी प्रभावित रसुवामा भने हालसम्म करिब ९० प्रतिशत क्षेत्रमा विद्युत् सेवा पुनःस्थापना गरिएको प्रवक्ता शाक्यले जानकारी दिए । उनका अनुसार उत्तरगया गाउँपालिका–१ तथा गोसाइँकुण्ड गाउँपालिकाका वडा नं. १, २ र ३ बाहेक जिल्लाका अधिकांश क्षेत्रमा विद्युत् सेवा सञ्चालनमा आएको छ ।
राष्ट्रिय विद्युत् वितरण प्रणाली नपुगेका क्षेत्रमा वैकल्पिक ऊर्जा प्रवद्र्धन केन्द्रमार्फत संस्थागत तथा घरेलु सौर्य प्रणाली जडान गरी विद्युत् सेवा क्रमशः पुनःस्थापना भइरहेको मन्त्रालयले जनाएको छ ।
भोटेकोशी बाढीका कारण रसुवा, नुवाकोट र धादिङमा विद्युत् वितरणका पोल, तारलगायतका पूर्वाधारमा क्षति पुगेपछि विभिन्न स्थानमा विद्युत् सेवा अवरुद्ध भएको थियो । क्षतिग्रस्त संरचना पुनर्निर्माण तथा मर्मत गर्दै प्रभावित क्षेत्रमा विद्युत् आपूर्ति सामान्य बनाउने कामलाई सरकारले प्राथमिकताका साथ अघि बढाइरहेको छ ।
