काठमाडौं । वाणिज्य, आपूर्ति तथा उपभोक्ता संरक्षण विभागले काठमाडौं उपत्यकामा प्रतिकेजी ११० रुपैयाँमा चिनी सर्वसुलभ रूपमा बिक्री भइरहेको जनाएको छ।
विभागले बुधबार प्रेस विज्ञप्ति जारी गर्दै भोटेकोशी नदीमा आएको बाढी–पहिरोका कारण पृथ्वी राजमार्गको कृष्णभीर खण्ड अवरुद्ध हुनुका साथै भारतले चिनी निकासीमा प्रतिबन्ध लगाएका कारण चाडपर्वका बेला चिनीको अभाव हुन सक्ने विषय विभिन्न सञ्चारमाध्यममा प्रकाशित भएको जनाएको छ।
यसै विषयमा उद्योग, वाणिज्य तथा आपूर्ति मन्त्रालयका मन्त्रीको अध्यक्षतामा भदौ ३० गते सरोकारवालासँग भएको बैठकपछि काठमाडौं उपत्यकाका एक हजारभन्दा बढी बिक्री केन्द्रबाट प्रतिकेजी ११० रुपैयाँका दरले चिनी बिक्री भइरहेको विभागले स्पष्ट पारेको हो।
भाटभटेनी, बिगमार्ट, सेल्सबेरीलगायतका बिक्री केन्द्रबाट चिनी सहज रूपमा उपलब्ध भइरहेको विभागले जनाएको छ। चिनीको सहज तथा पर्याप्त आपूर्ति भइरहेको भन्दै विभागले उपभोक्तालाई आवश्यकताभन्दा बढी चिनी सञ्चय नगर्नसमेत आग्रह गरेको छ।
विभागले बजारमा चिनीको अभाव नरहेको र उपभोक्तालाई आवश्यक परिमाणमा खरिद गर्न अनुरोध गरेको छ।
