काठमाडौँ । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानबहादुर शाहीले भोटेकोशी बाढी तथा विपद् व्यवस्थापनका लागि एक साताभित्र सर्वदलीय राजनीतिक संयन्त्र गठन गर्ने निर्णय भएको बताउनुभएको छ ।
बुधवार बसेको सर्वदलीय बैठकपछि सञ्चारकर्मीसँग कुरा गर्दै शाहीले बाढी प्रभावित तथा बेपत्ता नागरिकका समस्या सम्बोधन गर्न आवश्यक कानुनी व्यवस्था गर्ने विषयमा समेत छलफल भएको जानकारी दिनुभयो ।
उहाँका अनुसार बाढीका कारण बेपत्ता भएका व्यक्तिको अवस्था, उनीहरूसँग सम्बन्धित बीमा, डीएनए पहिचानलगायतका विषयलाई कानुनी रूपमा सम्बोधन गर्न ‘सनसेट ल’ ल्याउने विषयमा बैठकमा छलफल भएको थियो ।
उहाँले भन्नुभयो, “अबको सात दिनभित्र सर्वदलीय संयन्त्र बन्ने र संसदीय समिति बन्नेछ । सनसेट लहरू लागू गर्ने कुरा भएको छ । बाढीपीडित अहिले जसरी बेपत्ता छन्, बेपत्ता भइसकेपछि पनि उनीहरूको इन्स्योरेन्सको कुरा छ । डीएनएको कुरा छ ।”
बैठकले भोटेकोशी बाढीपछि खोजी, उद्धार, राहत, पुनःस्थापना तथा पुनर्निर्माणका कामलाई प्रभावकारी बनाउन उच्चस्तरीय सर्वदलीय राजनीतिक संयन्त्रलाई निरन्तरता दिने निर्णय गरेको थियो ।
संयन्त्रमा संसद्मा प्रतिनिधित्व गर्ने विभिन्न राजनीतिक दललाई सहभागी गराउने तथा छुटेका दललाई समेत समेट्ने विषयमा छलफल भएको शाहीले बताउनुभयो ।
त्यस्तै, विपद् व्यवस्थापन, जलवायु परिवर्तन तथा राज्यका विभिन्न निकायबाट भइरहेका कामको अध्ययन, समन्वय र अनुगमन गर्न संसद्भित्र विशेष समिति गठन गर्ने निर्णयसमेत बैठकले गरेको छ ।
विशेष समिति गठनका लागि सभामुखसमक्ष आग्रह गर्ने र एक साताभित्र समिति गठन गर्ने पहल गर्ने निर्णय सर्वदलीय बैठकले गरेको शाहीले जानकारी दिनुभयो।
