काठमाडौँ । नेपाल ट्रक यातायात व्यवसायी महासंघले विपद्को वर्तमान परिस्थितिलाई मध्यनजर गर्दै सरकारले निर्धारण गरेको ढुवानी भाडामात्र लिएर सेवा सञ्चालन गर्न आफ्ना सदस्य व्यवसायी तथा सवारीधनीलाई आग्रह गरेको छ।
महासंघका महासचिव बद्रीप्रसाद चौलागाईंले जारी गरेको सूचनामा विपद्को विषम परिस्थितिको फाइदा नउठाउन व्यवसायीलाई आग्रह गरिएको छ।
सूचनामा काठमाडौँबाट धनगढीसम्मको ढुवानी भाडा अत्यधिक लिएको भन्ने गुनासो सरकारको ‘हेलो सरकार’ गुनासो पोर्टलमा प्राप्त भएको जनाएको छ। सो गुनासोबारे आवश्यक विवरण पठाउन महासंघलाई पत्र प्राप्त भएको समेत उल्लेख गरिएको छ।
‘नेपाल सरकारले निर्धारण गरेको ढुवानी भाडामात्र लिएर आफ्ना सवारी साधन सञ्चालन गर्न’ महासंघका सबै सदस्य संस्थालाई सूचित गरिएको छ। साथै सरकारले तोकेको भन्दा बढी भाडा नलिई सेवाप्रवाह गर्न तथा गराउन सवारीधनी र व्यवसायीलाई महासंघले अनुरोध गरेको छ।
महासंघले विपद्का बेला अत्यावश्यक वस्तुको ढुवानीमा अतिरिक्त शुल्क असुल नगरी जिम्मेवार ढंगले सेवा दिन व्यवसायीलाई आग्रह गरेको हो।
