काठमाडौं । रसुवामा आएको विनाशकारी बाढीपछि प्रभावित क्षेत्रमा नेपाली सेनाले खोज तथा उद्धार कार्यलाई निरन्तरता दिएको छ।
नेपाली सेनाका हेलिकप्टरमार्फत आज भदौ १५ गते दिउँसो १ः३० बजेसम्म ३३० जनाको उद्धार गरिएको सेनाले जनाएको छ।
बाढी प्रभावित क्षेत्रमा रहेका जलविद्युत् आयोजनाका सुरुङमा समेत सेनाको टोलीले खोज तथा उद्धार गरिरहेको छ। त्रिशूली–३ जलविद्युत् आयोजनाको सुरुङमा करिब १५ मिटर भित्रसम्म पुगेर खोज तथा उद्धारको काम भइरहेको छ।
त्यस्तै, त्रिशूली–३ बीको सुरुङमा विज्ञ फौजसहितको टोली परिचालन गरी खोज तथा उद्धार जारी राखिएको छ।
रसुवागढी जलविद्युत् आयोजनाको सुरुङमा पनि संयुक्त टोलीले खोजी गरेको छ। टोली सुरुङभित्र करिब २५० मिटर अगाडि रहेको अन्तिम भागसम्म पुगेको थियो। त्यहाँ मानिस फेला नपरेपछि टोली फर्किएको सेनाले जनाएको छ।
बाढी प्रभावित जिल्लाहरूमा नेपाली सेनाका ८ हजार ९ सयभन्दा बढी फौज प्रत्यक्ष रूपमा परिचालन भएका छन्। उनीहरूले खोला, डाँडा तथा स्थानीयका घरघरमा पुगेर खोज तथा उद्धार कार्य गरिरहेका छन्।
सेनाले प्रभावित क्षेत्रमा अन्य सुरक्षा निकाय तथा स्थानीयसँग समन्वय गरी खोज, उद्धार तथा आवश्यक सहयोगका कामलाई निरन्तरता दिइरहेको जनाएको छ।
