पोखरा । रसुवाको भोटेकोशी नदीमा आएको विनाशकारी बाढीका कारण ज्यान गुमाएका तथा विभिन्न जिल्लाका नदी तटीय क्षेत्रमा फेला परेका १०२ वटा शव पहिचान, डीएनए नमुना सङ्कलन र पोस्टमार्टमका लागि कास्कीको पोखरा ल्याइएको छ ।
धादिङ, गोरखा, तनहुँ र पूर्वी नवलपरासी लगायतका जिल्लामा फेला परेका शव परीक्षण तथा व्यवस्थापनका लागि आवश्यक पूर्वाधार र सुविधा पर्याप्त नभएपछि कास्की जिल्ला प्रशासन कार्यालयको समन्वयमा पोखरा ल्याइएको हो ।
जिल्ला प्रशासन कार्यालयका अनुसार बिहीबार राति मात्रै पूर्वी नवलपरासीबाट ४१, धादिङबाट २७, तनहुँबाट २३ र गोरखाबाट ११ वटा शव पोखरा ल्याइएको हो ।
एकैपटक ठूलो सङ्ख्यामा शव ल्याइएपछि पोखराका स्वास्थ्य संस्थामा शव व्यवस्थापनको चाप बढेको छ । हाल अधिकांश शव पश्चिमाञ्चल क्षेत्रीय अस्पतालमा राखिएको छ । तनहुँमा फेला परेका नौ वटा शवलाई पोखरा स्वास्थ्य विज्ञान प्रतिष्ठानमा प्रारम्भिक परीक्षण गरी थप व्यवस्थापनका लागि मणिपाल शिक्षण अस्पताल पठाइएको प्रशासनले जनाएको छ ।
पोखराका सरकारी तथा निजी अस्पतालमा गरी करिब ८८ वटा शव राख्न सकिने क्षमता रहेकामा ठूलो सङ्ख्यामा शव ल्याइएपछि शवगृहहरू लगभग पूर्णरूपमा भरिएका छन् ।
स्थानीय प्रशासनका अनुसार बाढीमा परेका अधिकांश शव क्षतविक्षत अवस्थामा फेला परेकाले पहिचान गर्न चुनौती भएको छ । कास्की प्रहरी र जिल्ला प्रशासन कार्यालयको टोलीले शवको वैज्ञानिक परीक्षण तथा पहिचानलाई प्राथमिकतामा राखेर काम गरिरहेको कास्कीका प्रहरी उपरीक्षक नवीन कार्कीले बताउनुभयो ।
उहाँका अनुसार प्रत्येक शवको तस्बिरसहित आवश्यक विवरण अभिलेख राख्नुका साथै पहिचानका लागि डीएनए परीक्षण गर्न नमुना सङ्कलन गर्ने कामलाई तीव्रता दिइएको छ ।
परीक्षण प्रक्रिया पूरा भएपछि पहिचान हुन नसकेका शवको हुलिया र विस्तृत विवरणसहित सार्वजनिक सूचना जारी गरिने प्रशासनले जनाएको छ ।
बाढीपछि आफन्त हराइरहेका परिवारलाई पोखराका सम्बन्धित अस्पताल तथा प्रशासनसँग सम्पर्क गरी शव पहिचानमा सहयोग गर्न आग्रह गरिएको छ । पहिचान हुन नसकेका शवलाई प्रचलित कानुनी प्रक्रिया तथा मापदण्ड पूरा गरी अन्तिम संस्कार गरिने प्रशासनले जनाएको छ ।
