काठमाडौं । आन्तरिक राजश्व विभागले करदातालाई प्रदान गर्ने सेवालाई थप सहज, सरल र प्रभावकारी बनाउने उद्देश्यले ‘करदाता पोर्टल’को नयाँ संस्करण परीक्षण प्रयोगमा ल्याएको छ ।
विभागले भदौ ९ गतेदेखि नयाँ पोर्टलको परीक्षण सुरु गरेको हो । विभागका महानिर्देशक डा. भीष्मकुमार भुसालका अनुसार नयाँ पोर्टलको परीक्षण सफल नभएसम्म साविकको करदाता पोर्टल पनि यथावत् सञ्चालनमा रहनेछ ।
‘डिजाइन ड्रिभन डेभलपमेण्ट’ पद्धति र ‘माइक्रो सर्भिस आर्किटेक्चर’मा आधारित भएर नयाँ पोर्टल विकास गरिएको विभागले जनाएको छ । नयाँ पोर्टलमा करदाताको सेवा प्रवाहलाई डिजिटल र सहज बनाउने गरी विभिन्न नयाँ सुविधा थप गरिएको छ ।
नयाँ व्यवस्थाअनुसार अन्तःशुल्कजन्य प्रतिष्ठानहरूले बुझाउने मासिक विवरण यसअघि आन्तरिक राजश्व कार्यालयबाट मात्रै रुजु हुने गरेकोमा अब करदाता स्वयंले रुजु गर्न सक्नेछन् ।
त्यस्तै, आय विवरण (डे–०४) अन्तर्गत साविकमा अनुसूची–१० मा करदाताले विवरण भर्नुपर्ने व्यवस्थालाई परिमार्जन गरी अब उक्त विवरण स्वतः आउने व्यवस्था गरिएको छ । स्रोतमा कट्टी भएको करको विवरण मासिक रूपमा बुझाउनुपर्ने व्यवस्था पनि पोर्टलमा समावेश गरिएको छ ।
विदेशी लगानीकर्ताले स्थायी लेखा नम्बर (प्यान) दर्ताका लागि अनलाइनमार्फत नै निवेदन दिन सक्ने व्यवस्था गरिएको छ । करदाताले आफ्नो स्थायी लेखा नम्बर कार्ड, अन्तःशुल्क इजाजतपत्र तथा करचुक्ता प्रमाणपत्रसमेत पोर्टलमा लगइन गरी आफैं डाउनलोड गर्न सक्नेछन् ।
यसैगरी, मूल्य अभिवृद्धि कर (भ्याट) विवरण संशोधनसम्बन्धी सेवासमेत नयाँ पोर्टलमा समावेश गरिएको विभागले जनाएको छ ।
पोर्टल हाल परीक्षणकै क्रममा रहेकाले प्रयोगका क्रममा केही सामान्य प्राविधिक समस्या आउन सक्ने विभागले जनाएको छ । करदाताको सुविधालाई ध्यानमा राख्दै पोर्टलको डिजाइनलाई थप सरल बनाउने तथा आवश्यक थप सुविधाहरू पहिचान गरी छिट्टै व्यवस्थापन गर्ने प्रतिबद्धता महानिर्देशक डा. भुसालले व्यक्त गरेका छन् ।
विभागले नयाँ पोर्टल पूर्ण रूपमा सञ्चालनमा आएपछि करसम्बन्धी विभिन्न सेवा प्राप्त गर्न करदाताले कार्यालयमै पुग्नुपर्ने बाध्यता कम हुने अपेक्षा गरेको छ ।
