काठमाडौं । श्रम संस्कृति पार्टीकी सांसद अम्बिकादेवी सङ्ग्रौलाले चालु आर्थिक वर्षका लागि सरकारले ल्याएको बजेटको असफलता पहिलो महिनादेखि नै देखिन थालेको टिप्पणी गर्नुभएको छ ।
प्रतिनिधि सभाको सोमबारको बैठकमा बोल्दै सांसद सङ्ग्रौलाले बैंकिङ प्रणालीमा पर्याप्त तरलता हुँदाहुँदै पनि व्यवसायीहरू ऋण लिएर लगानी गर्न इच्छुक नदेखिनु सरकारको आर्थिक नीतिप्रति अविश्वासको संकेत भएको बताउनुभयो ।
उहाँले अर्थमन्त्री स्वर्णिम वाग्लेले ३६ देशलाई चिनेको दाबी गरिए पनि आफ्नै देशको अर्थतन्त्रको अवस्था बुझ्न नसकेको आरोप लगाउनुभयो । सरकार गठन भएयता पुँजीबजारमा ६ खर्ब रुपैयाँ डुबेको दाबी गर्दै उहाँले अर्थतन्त्रमा देखिएको समस्या समाधान गर्न सरकार गम्भीर हुनुपर्ने बताउनुभयो ।
सांसद सङ्ग्रौलाले भन्नुभयो, ‘अर्थमन्त्रीज्यूले ३६ देशलाई चिनेको भनेर सत्तापक्षका माननीयज्यूहरूले भन्नुहुन्छ । तर उहाँले ३६ देशलाई चिनेर आफ्नै देशलाई चिन्न सक्नुभएन । उहाँले ल्याएको बजेटको असफलता पहिलो महिना सकिँदा नै देखिन थाल्यो ।’
नेपालको अर्थतन्त्रमा यसअघि कहिल्यै नदेखिएको स्तरको समस्या र कमजोरी देखिएको दाबी गर्दै उहाँले बैंकिङ प्रणालीमा पर्याप्त तरलता हुँदाहुँदै पनि व्यवसायीहरू ऋण लिएर लगानी गर्न इच्छुक नहुनुको कारण सरकारले खोज्नुपर्ने बताउनुभयो ।
‘बैंकिङ प्रणालीमा यतिधेरै तरलता हुँदा पनि किन कोही लगानी गर्न ऋण लिन चाहिरहेको छैन ? के व्यवसायीहरूलाई दुई तिहाइ बहुमतको सरकारको अर्थनीतिमा अविश्वास भएकै हो त ?’ उहाँले प्रश्न गर्नुभयो ।
सांसद सङ्ग्रौलाले वर्तमान सरकार गठन भएयता पुँजीबजारमा ६ खर्ब रुपैयाँ डुबेको दाबी गर्दै त्यसप्रति सरकारको ध्यान जान नसकेको आरोप लगाउनुभयो । पुँजीबजारमा देखिएको समस्या समाधान गर्नुपर्ने समयमा अर्थमन्त्री वाग्ले चिठ्ठा खेलाउने विषयमा बढी केन्द्रित भएको उहाँको आरोप थियो ।
उहाँले अर्थतन्त्रका समस्या समाधान नगरी देशको विकास सम्भव नहुने भन्दै सरकारलाई आर्थिक नीति प्रभावकारी बनाउन र लगानीको वातावरण निर्माण गर्न आग्रह गर्नुभयो ।
