काठमाडौँ । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानबहादुर शाहीले बलात्कारपछि हत्या हुने घटनासम्बन्धी प्रचलित कानून संशोधन गर्न सरकारसँग माग गर्नुभएको छ ।
प्रतिनिधि सभाको सोमबारको बैठकमा बोल्दै नेता शाहीले कानून संशोधनको मस्यौदा तयार गरी तत्काल संसदमा पेश गर्न सरकारलाई आग्रह गर्नुभएको हो । उहाँले यस विषयमा सत्तापक्ष र प्रतिपक्ष नभनी संसदबाट कानून संशोधन गरी पारित गर्नुपर्नेमा जोड दिनुभयो ।
उहाँले भन्नुभयो, “बलात्कारपछि हत्याको सम्बन्धमा नेपालमा जुन प्रचलित कानून छ, यसलाई संशोधन गर्नुपर्ने देखियो । हामी सरकारलाई अपिल गर्न चाहन्छौँ, कानूनको ड्राफ्ट बनाएर ल्याउनुहोस् । हामी सत्तापक्ष र प्रतिपक्ष नभनीकन यसलाई संशोधन गरौँ र संसदबाट पास गरौँ ।”
नेता शाहीले यस विषयमा संसदमा पटक–पटक छलफल गर्नुभन्दा सरकारले कानून संशोधनको मस्यौदा तयार गरी संसदमा ल्याउनुपर्ने बताउनुभयो ।
यसैगरी, फरक प्रसंगमा उहाँले विदेशी स्याउको आयातका कारण स्वदेशी स्याउले बजार पाउन नसकेको बताउनुभयो । उहाँले भदौ र असोज महिनाभर विदेशी स्याउको आयात रोक्न कृषिमन्त्रीसँग आग्रह गर्नुभयो ।
नेता शाहीले जुम्लामा स्याउ उत्पादन बढाउन सरकारले लगानी गर्नुपर्नेमा समेत जोड दिनुभयो । स्वदेशी उत्पादनलाई प्रोत्साहन गर्दै किसानले उचित बजार पाउने वातावरण बनाउन सरकार गम्भीर हुनुपर्ने उहाँको भनाइ थियो ।
