काठमाडौं । नेकपा (एमाले)का नेता गोकुल बास्कोटाले पार्टी कसैको व्यक्तिगत ‘मौजा’ नभएको बताएका छन्। उनले पार्टीभित्र कसले बोल्न पाउने र कसले नपाउने भन्ने निर्णय गर्ने अधिकार कसैलाई नभएको टिप्पणी गरेका छन्।
सामाजिक सञ्जालमार्फत बास्कोटाले सत्ता र नेताहरूमा कमजोर हुँदा अधिकारको कुरा गर्ने तथा शक्तिशाली हुँदा अरूको अभिव्यक्तिलाई अराजकता भन्ने प्रवृत्ति रहेको बताएका छन्।
‘कमजोर हुँदा अधिकार, बलियो हुँदा अराजकता ! जुनसुकै सत्ता वा नेता—हिजो, आज र भोलिको सदाबहार सत्य यही हो,’ उनले लेखेका छन्।
बास्कोटाले नेपालको वामपन्थी राजनीतिप्रति समेत टिप्पणी गर्दै अहिलेका वामपन्थी पार्टीहरू २०१७–२०२७ सालको अवस्थाजस्तै अन्योलमा पुगेको बताएका छन्। उनले वामपन्थी दलहरूको अवस्थालाई ‘क्रसरोडमा उभिएको यात्री’सँग तुलना गरेका छन्।
