काठमाडौं । नेपाली कांग्रेसका सभापति गगन थापाले नेपालले तत्काल कुनै नयाँ राजनीतिक ‘एड्भेन्चर’ धान्न नसक्ने बताउनुभएको छ ।
बिहीबार काठमाडौंमा आयोजित ‘दोलखाका लोकनायकहरू’ पुस्तक विमोचन कार्यक्रममा बोल्दै सभापति थापाले राष्ट्रिय स्वतन्त्र पार्टी (रास्वपा)ले पाँच वर्ष सरकार सञ्चालन गर्ने जनादेश पाएको भन्दै उसलाई काम गर्ने अवसर दिनुपर्ने बताउनुभयो ।
उहाँले पाँच वर्षपछि कांग्रेसले सरकार सञ्चालन गर्ने गरी आफूहरू तयारीमा जुट्ने बताउनुभयो । विगतका राजनीतिक घटनाबाट पाठ सिकेर कांग्रेसले आफूलाई सुधार्दै अघि बढ्ने उहाँको भनाइ थियो ।
नयाँ राजनीतिक शक्तिहरूलाई विगतमा पुराना दलहरूले गरेका गल्ती र भोगेका संकट नदोहोर्याउन सुझाव दिँदै थापाले संख्यात्मक शक्ति नै सबैथोक हो भन्ने भ्रमबाट मुक्त हुन सरकारलाई आग्रह गर्नुभयो ।
विगतमा कांग्रेस र एमालेले जनताको असन्तुष्टिलाई बेवास्ता गर्दै आफूहरूसँग रहेको बहुमत र जनादेशलाई पर्याप्त ठानेको परिणाम अहिले भोग्नुपरेको उहाँले बताउनुभयो । दुईतिहाइ बहुमत भए पनि निरन्तर जनसमर्थन र नैतिक नेतृत्व गुमेपछि राजनीतिक शक्ति कमजोर बन्ने उहाँको भनाइ थियो ।
‘हामी एकैपटक माथि मात्रै हेर्यौँ, हामीसँग पाएको शक्ति, प्रतिष्ठा मात्रै हेर्यौँ, त्यसले हामीलाई ठीक ठाउँमा पुर्याउन सक्दैन,’ उहाँले भन्नुभयो, ‘हिजो हामीले सिकेको कुरा हो यो । हामी त्यो सिकाइबाट आफूलाई सच्याउन चाहन्छौँ, आफूलाई बदलेर लैजान चाहन्छौँ ।’
थापाले रास्वपाले पाँच वर्ष नेतृत्व गर्ने र त्यसपछि निर्वाचनमार्फत जनताले निर्णय गर्ने बताउनुभयो । ‘नयाँ पोलिटिकल एड्भेन्चर नेपालमा नगर्नुस् । नेपालले थेग्न सक्दैन,’ उहाँले भन्नुभयो ।
लोकतन्त्रमा नैतिक नेतृत्वको महत्वपूर्ण भूमिका हुने उल्लेख गर्दै उहाँले सरकारले निर्वाचनमा मत दिएका र नदिएका दुवै पक्षका नागरिकको विश्वास कायम राख्नुपर्ने बताउनुभयो ।
सभापति थापाले संसदको गरिमा र सांसदको जिम्मेवारीप्रति समेत प्रश्न उठाउनुभयो । संसदमा पुगेपछि सांसदहरूले आफूले बोल्ने हरेक शब्द र गर्ने हरेक निर्णयप्रति गम्भीर हुनुपर्ने उहाँको भनाइ थियो ।
‘मैले भोट पाएको छु, मैले जे बोले पनि हुन्छ, जे फुके पनि हुन्छ भन्ने संसद हो यो ? संसदको गरिमा हुँदैन ? संसदको मर्यादा हुँदैन ?’ उहाँले प्रश्न गर्नुभयो ।
संसद, सरकार, अदालत तथा संवैधानिक निकायमा जिम्मेवारी पाएका सबैले आफ्नो अधिकार कानुनी रूपमा मात्रै नभई जनभावनाका दृष्टिले समेत वैध र औचित्यपूर्ण ढंगले प्रयोग गर्नुपर्ने थापाले बताउनुभयो ।
कतिपय निर्णय कानुनसम्मत भए पनि जनभावनाविपरीत हुन सक्ने उल्लेख गर्दै उहाँले जनताको भावनाविपरीत जाने छुट कसैलाई नरहेको स्पष्ट पार्नुभयो ।
