काठमाडौं । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेले संविधान संशोधनका लागि प्रतिनिधि सभामा दुईतिहाइ बहुमत मात्र पर्याप्त नहुने बताउनुभएको छ ।
बिहीवार सिंहदरबारमा बसेको प्रतिनिधि सभाअन्तर्गतको राज्य व्यवस्था तथा सुशासन समितिको बैठकमा बोल्दै लामिछानेले संविधान संशोधनका लागि आवश्यक कानूनी तथा संवैधानिक प्रक्रियाका सबै पक्षलाई ध्यान दिनुपर्ने बताउनुभएको हो ।
संविधान संशोधनका लागि आवश्यक संख्या पु¥याउन सरकारलाई सहयोग गर्ने विभिन्न राजनीतिक दलका नेताहरूको अभिव्यक्तिको स्वागत गर्दै उहाँले प्रतिनिधि सभामा दुईतिहाइ मत पुग्नु मात्रै संशोधनको अन्तिम आधार नभएको स्पष्ट पार्नुभयो ।
उहाँले भन्नुभयो, “कतिपय माननीयज्यूहरूले सरकारलाई समर्थन गर्दै सरकार अघि बढोस्, हामी सहयोग गर्छौँ, संविधान संशोधनका लागि आवश्यक संख्या पनि दिन्छौँ भन्नुभएको छ । तर संविधान संशोधनका लागि प्रतिनिधि सभामा मात्र दुईतिहाइ संख्या पुग्नु पर्याप्त हुँदैन ।”
लामिछानेले संविधान र कानूनले तोकेका आवश्यक सबै प्रक्रिया पूरा गरेर मात्रै संशोधनको विषय अघि बढाउनुपर्नेमा जोड दिनुभयो । संविधान संशोधनजस्तो संवेदनशील विषयमा भावनाभन्दा कानूनी र संवैधानिक व्यवस्थालाई प्राथमिकता दिनुपर्ने उहाँको भनाइ छ ।
सरकारलाई सहयोग गर्ने तत्परता देखाएका राजनीतिक दलहरूप्रति आभार व्यक्त गर्दै लामिछानेले उनीहरूको सकारात्मक भावना र सहकार्यको स्पिरिटको सम्मान गर्ने बताउनुभयो ।
उहाँले संविधान संशोधनको विषयमा संविधान तथा कानूनका सबै प्रावधानको पूर्ण पालना गर्दै अघि बढ्नुपर्ने धारणा राख्नुभयो ।
