काठमाडौं । बाराको जीतपुरसिमरा उपमहानगरपालिका–१ दसधुरेकी तीन वर्षीया बालिका गरिमा चौधरीको हत्या भएको घटनाको विरोधमा स्थानीयवासीले बुधबार बिहानदेखि सडक अवरुद्ध गरी प्रदर्शन गरिरहेका छन्।
बालिकालाई न्याय दिलाउन माग गर्दै गरिएको प्रदर्शन आज पनि जारी छ। पीडित परिवार तथा स्थानीयवासीले बुधबार बिहानैदेखि पथलैया–वीरगन्ज सडकखण्डमा टायर बालेर प्रदर्शन गर्दै सडक ठप्प पारेका हुन्।
उनीहरूले बालिकाको हत्यामा संलग्नलाई कडा कारबाही गर्न तथा पीडित परिवारलाई न्याय दिन माग गरेका छन्।
प्रहरीका अनुसार साउन ३१ गतेदेखि बेपत्ता भएकी तीन वर्षीया गरिमाको सोही दिन हत्या भएको खुलेको छ। घटनाको अनुसन्धानका क्रममा प्रहरीले दुई जनालाई पक्राउ गरेको जनाएको छ।
पक्राउ परेकामध्ये एक जनाले बालिकाको हत्या गरेको बयान प्रहरीसमक्ष दिएको बताइएको छ। घटनाको थप अनुसन्धान भइरहेको प्रहरीले जनाएको छ।
