काठमाडौं । कर्णाली प्रदेशका मुख्यमन्त्री मंगलबहादुर शाहीले प्रदेश सभाबाट विश्वासको मत प्राप्त गरेका छन्।
बुधबार बसेको प्रदेश सभा बैठकमा मुख्यमन्त्री शाहीले राखेको विश्वासको मतसम्बन्धी प्रस्ताव बहुमतले पारित भएको हो।
कुल ४० सदस्यीय प्रदेश सभामा बुधबार ३६ सांसद उपस्थित थिए। प्रस्तावको पक्षमा २१, विपक्षमा १३ मत परेको छ भने दुई सांसद तटस्थ बसेका छन्।
कर्णाली प्रदेशमा सरकार गठनका लागि २१ सांसदको समर्थन आवश्यक पर्छ। मुख्यमन्त्री शाहीले आवश्यक बहुमत प्राप्त गरेसँगै सरकारको निरन्तरता सुनिश्चित भएको छ।
प्रदेश सभामा सत्तारूढ नेकपाका १४ र एमालेका १० जना गरी २४ सांसद छन्। एमालेका १० सांसदमध्ये सभामुखसमेत रहेका छन्। त्यस्तै, नेपाली कांग्रेसका १५ सांसद छन्। नेकपा परित्याग गरेका पूर्वमुख्यमन्त्री राजकुमार शर्मा र राप्रपाका एक सांसद पनि प्रदेश सभामा रहेका छन्।
