काठमाडौं । नेपाली कांग्रेसको संस्थापनइतर पक्षले पार्टीको १५औँ महाधिवेशनसम्बन्धी पछिल्लो निर्णयविरुद्ध अदालत जाने तयारी गरेको छ।
संस्थापनइतर पक्षका नेताहरूले एक–दुई दिनभित्रै अदालत जाने तयारी भइरहेको बताएका छन्। यसका लागि कानुनी पक्षबारे अध्ययन भइरहेको उनीहरूको भनाइ छ।
कांग्रेस केन्द्रीय निर्वाचन समितिले मंगलबार केन्द्रीय समितिको यसअघिको निर्णयअनुसार १५औँ महाधिवेशन असोज १६ देखि १९ गतेसम्म गर्ने कार्यतालिका यथावत् राख्दै तल्ला तहका अधिवेशनको तालिका भने हेरफेर गरेको थियो।
निर्वाचन समितिको उक्त निर्णयपछि पार्टीभित्रको विवाद थप चर्किएको हो। संस्थापनइतर पक्षले महाधिवेशनको प्रक्रिया र कार्यतालिकासम्बन्धी विषयलाई लिएर कानुनी बाटो रोज्ने तयारी गरेको जनाएको छ।
यसअघि विशेष महाधिवेशनसम्बन्धी निर्णयको पुनरवलोकन माग गर्दै निवर्तमान सभापति शेरबहादुर देउवा पक्ष अदालत पुगेको थियो। उक्त विषयमा सर्वोच्च अदालतले पुनरवलोकनको अनुमति दिएपछि कांग्रेसभित्र महाधिवेशनसम्बन्धी कानुनी विवाद थप पेचिलो बनेको छ।
अब निर्वाचन समितिले तय गरेको पछिल्लो कार्यतालिका र त्यससँग सम्बन्धित निर्णयविरुद्ध संस्थापनइतर पक्षले अदालतमा कस्तो कानुनी दाबी अघि सार्छ भन्ने विषयलाई चासोका साथ हेरिएको छ।
