ललितपुर । कानून, न्याय तथा संसदीय मामिलामन्त्री भानुभक्त ढकालले चाडपर्व नजिकिएसँगै व्यवसायीलाई उपभोक्ताको हितमा काम गर्न अनुरोध गरेका छन् । नेपाल ट्रक यातायात व्यवसायी महासङ्घको आजको तेह्रौ वार्षिक साधारणसभा उद्घाटनसत्रमा उनले सबै व्यवसायीलाई सकारात्मक ढङ्गबाट काम अघि बढाउन आग्रह गर्दै व्यवसायीको माग नेतृत्व तहसम्म पुर्याइने आश्वासन दिए ।
उनले कानून निर्माणमा कुनै त्रुटि भए प्रस्ताव लिएर मन्त्रालय आउन पनि व्यवसायीलाई आग्रह गरे । सो अवसरमा महासङ्घले ट्रक व्यवसायीलाई सडकमा सहज ढङ्गको मार्ग इजाजत उपलब्ध गराउनुपर्ने माग मन्त्रीसमक्ष राखेको थियो । महासङ्घका अध्यक्ष राजेन्द्रकुमार श्रेष्ठले ढुवानी व्यवसायीलाई सहज रुपमा मार्ग इजाजतपत्र उपलब्ध नगराए उनीहरुको आर्थिक अवस्था नाजुक हुँदै जीवनमरणको अवस्था सिर्जना हुने गुनासो गरेका थिए ।
“सरकारले मूल्य अभिवृद्धि कर ढुवानी व्यवसायीका लागि होइन भने तापनि लगाउने घोषणा गरेकाले त्यसलाई हटाउन माग गरेका छौं”, श्रेष्ठले भने, “ट्रक व्यवसायीको आर्थिक अवस्था विचार गरी दुर्घटनामा परेका घाइतेहरुको औषधि उपचारका लागि प्रभावकारी बीमाको कार्यान्वयन हुनुपर्छ ।” ट्रक व्यवसायीका हकमा राहतकोष खडा गर्न अत्यन्त जरुरी रहेको उनले बताए ।
महासङ्घका महासचिव राजेन्द्रविक्रम बानियाँले तीन तहको सरकारमा यातायात सञ्चालनको भूमिका कसरी अघि बढाउने भन्ने निश्चित नभएकाले समाजमा अन्योल सिर्जना भएको गुनासो गरे । “यातायात सञ्चालनमा प्रदेश–प्रदेशबीच समन्वय भएर अघि नबढ्दा समस्या उत्पन्न भएको हो । सो कुरालाई विचार गरी यातायातमैत्री ऐन कानून तर्जुमा गर्न आवश्यक रहेको छ”, बानियाँले भने, “राजधानीको काठमाडाँैलगायत देशका कतिपय मुख्यमुख्य शहरहरुमा ट्रक पार्किङ स्थल नभएकाले यातायात ढुवानीमा समस्या भइरहेको छ ।”
सरकारले डेढ वर्षअघि यातायात व्यवसायी सङ्घसंस्थाको नवीकरण नगरी खारेजीको बाटामा लैजाने घोषणा अघि बढाएकामा सबै व्यवसायीको आपत्ति रहेको उनले बताए । नारायणी यातायात व्यवसायी महासङ्घका केन्द्रीय सदस्य बद्री चौलागाईँले सरकारले व्यवसायीमा उथलपुथलको अवस्था सिर्जना गरेको गुनासो गरे ।
