काठमाडौं । परराष्ट्रमन्त्री शिशिर खनालले इन्डोनेसियाको फ्लोरेस द्वीपमा गएको भूकम्पबाट जनधनको क्षति भएकामा गहिरो दुःख व्यक्त गर्नुभएको छ ।
भूकम्पबाट प्रभावित इन्डोनेसियाप्रति नेपाल सरकार र नेपाली जनताको ऐक्यबद्धता तथा सहानुभूति व्यक्त गर्दै मन्त्री खनालले प्राकृतिक विपद्बाट हुने पीडा र दुःख नेपालले समेत भोगिसकेको बताउनुभएको छ ।
सामाजिक सञ्जाल ‘एक्स’मार्फत उहाँले भूकम्पमा परी ज्यान गुमाएकाहरूका शोकसन्तप्त परिवारजनप्रति हार्दिक समवेदना व्यक्त गर्दै घाइतेहरूको शीघ्र स्वास्थ्यलाभको कामना गर्नुभएको छ ।
उहाँले भूकम्पबाट प्रभावित, बेपत्ता तथा विस्थापित सबैको सुरक्षा सुनिश्चित गर्दै शीघ्र उद्धार, राहत तथा पुनःस्थापनाको कामना गर्नुभएको छ ।
मन्त्री खनालले नेपाल सरकार तथा नेपाली जनताका तर्फबाट इन्डोनेसिया सरकार र त्यहाँका जनताप्रति ऐक्यबद्धता र सहानुभूति प्रकट गर्नुभएको हो ।
