काठमाडौं । नेपाल सांस्कृतिक संस्थान र चीनको संस्कृति तथा पर्यटन मन्त्रालयअन्तर्गतको चाइना एनिमेसन आर्ट ट्रुपको युवा चिनियाँ परम्परागत संगीत अर्केस्ट्रा संघबीच सांस्कृतिक सहकार्य तथा अनुभव आदानप्रदानलाई विस्तार गर्ने विषयमा छलफल भएको छ।
सांस्कृतिक संस्थानका महाप्रबन्धक किरणबाबु पुन र चीनको कुनमिङ झेन्जी आर्चरी क्लबका प्रमुख प्रशिक्षक मास्टर कङ तथा जनवादी गणतन्त्र चीनको संस्कृति तथा पर्यटन मन्त्रालयअन्तर्गतको चाइना एनिमेसन आर्ट ट्रुपको युवा चिनियाँ परम्परागत संगीत अर्केस्ट्राका प्रमुख याङ लिबीच भएको भेटवार्तामा आगामी दिनमा विभिन्न क्षेत्रमा सहकार्य गर्ने विषयमा सहमति भएको हो।
भेटमा महाप्रबन्धक पुनले नेपाल र चीनबीचको सांस्कृतिक सहकार्यले सांस्कृतिक पर्यटनको प्रवर्द्धनमा महत्वपूर्ण योगदान पुर्याउने विश्वास व्यक्त गर्नुभयो। उहाँले दुवै देशका कतिपय परम्परागत सांस्कृतिक गतिविधि समान प्रकृतिका रहेकाले संयुक्त कार्यक्रम, अनुभव आदानप्रदान तथा अनुसन्धानका क्षेत्रमा सहकार्यको पर्याप्त सम्भावना रहेको बताउनुभयो।
उहाँले ६७ वर्षदेखि क्रियाशील नेपाल सांस्कृतिक संस्थानले नेपालको मौलिक कला, संस्कृति र परम्पराको संरक्षण, संवर्द्धन तथा प्रवर्द्धनमा निरन्तर काम गरिरहेको जानकारी गराउँदै संस्कृति र प्राकृतिक सम्पदाले सम्पन्न नेपालमा सांस्कृतिक पर्यटन विकासका प्रशस्त सम्भावना रहेको उल्लेख गर्नुभयो।
महाप्रबन्धक पुनले रैथाने खानासहित विभिन्न जातजातिका मौलिक संस्कृति र परम्पराको प्रदर्शनमार्फत रोजगारी सिर्जना तथा आर्थिक समृद्धिको आधार निर्माण गर्ने दिशामा संस्थानले काम गरिरहेको पनि बताउनुभयो।
भेटका क्रममा मास्टर कङ र याङ लिले आगामी दिनमा नेपाल सांस्कृतिक संस्थानसँग सांस्कृतिक आदानप्रदान, प्रशिक्षण, संयुक्त कार्यक्रम तथा अन्य सहकार्यका क्षेत्रमा काम गर्न आफ्नो संस्था तयार रहेको जानकारी गराउनुभयो।
भेटवार्तामा काठमाडौं झेन्जी ट्रेडिसनल आर्चरी अर्गनाइजेसनका अध्यक्ष अभिषेकविक्रम शाहसहित दुवै पक्षका अन्य पदाधिकारीहरूको पनि उपस्थिति रहेको थियो।
काठमाडौं झेन्जी ट्रेडिसनल आर्चरी अर्गनाइजेसनले आगामी अक्टोबर २ देखि ७ गतेसम्म काठमाडौंमा प्रथम नेपाल पृथ्वीनारायण अन्तर्राष्ट्रिय परम्परागत आर्चरी प्रतियोगिता आयोजना गर्दैछ। उक्त प्रतियोगिताको तयारीका लागि चिनियाँ प्रतिनिधिमण्डल नेपाल आएको जनाइएको छ।
