काठमाडौं । पाकिस्तानको काराकोरम क्षेत्रमा अवस्थित ८,०४७ मिटर अग्लो ब्रड पिकमा गएको हिमपहिरोमा परेका विश्वप्रसिद्ध नेपाली आरोही निर्मल पुर्जा (निम्स दाइ) सहित थप तीन जनाको शव पहिचान भएको छ।
उद्धार टोलीले निम्स दाइसँगै नेपाली आरोही नीमा शेर्पा र किली पेम्बा शेर्पा (किलु) तथा चिनियाँ आरोही ह्याङ झोङको शव फेला पारेको जनाएको छ।
अल्पाइन क्लब अफ पाकिस्तानका अनुसार उद्धारकर्ताहरूले घटनास्थल नजिकै थप एउटा शव रहेको स्थान पनि पहिचान गरेका छन्। उक्त शव नेपाली आरोहीहरूको शव भेटिएको स्थानभन्दा अझै माथिल्लो भागमा रहेको बताइएको छ। शवको औपचारिक पहिचान भने हुन बाँकी छ।
हाल उद्धार टोलीले पहिचान भएका चारवटै शवलाई क्याम्प–१ (सी–१) तर्फ झार्ने कार्य गरिरहेको जनाएको छ।
यसअघि उद्धारमा खटिएको टोलीले निम्स दाइको शव समुद्री सतहबाट करिब ५ हजार ७ सय मिटर उचाइमा मृत अवस्थामा फेला पारेको थियो।
ब्रड पिकमा आएको भीषण हिमपहिरोपछि बेपत्ता भएका आरोहीहरूको खोज तथा उद्धार कार्य प्रतिकूल मौसमका बीच पनि जारी रहेको छ।
