काठमाडौं । नेकपा (एमाले) का महासचिव शंकर पोखरेलले राष्ट्रिय स्वतन्त्र पार्टी (रास्वपा) पपुलिजम, अवसरवाद र अराजकताको जगमा उदाएको टिप्पणी गर्नुभएको छ ।
शुक्रबार काठमाडौंमा आयोजित कार्यक्रममा बोल्दै महासचिव पोखरेलले रास्वपा जति छिटो राष्ट्रिय शक्तिका रूपमा उदाएको छ, त्यसको पतनको सम्भावना पनि उत्तिकै रहेको दाबी गर्नुभयो । उहाँले रास्वपा नेपाली राजनीतिमा दीर्घकालीन चुनौती बन्ने शक्ति नभएको भन्दै त्यसलाई सामना गर्न सकिने बताउनुभयो ।
महासचिव पोखरेलले रास्वपासहितका नयाँ राजनीतिक शक्तिलाई सामना गर्न एमालेले आफूलाई वैचारिक र सांगठनिक रूपमा थप सुदृढ बनाउनुपर्नेमा जोड दिनुभयो । उहाँले पार्टीबाट टाढिएको नयाँ पुस्ता, आधारभूत वर्ग तथा मध्यम वर्गको विश्वास पुनः जित्नुपर्ने आवश्यकता औंल्याउनुभयो ।
उहाँले समाजमा रहेका विभिन्न भाषा, संस्कृति र समुदायलाई पार्टीसँग जोड्न नीतिहरू अद्यावधिक गर्नुपर्ने, कार्यशैलीमा परिवर्तन ल्याउनुपर्ने तथा सांगठनिक संरचनामा सुधार गर्दै पार्टीलाई पुनर्गठन गर्नुपर्ने बताउनुभयो ।
महासचिव पोखरेलले एमाले अहिले यही दिशामा अघि बढिरहेको पनि स्पष्ट पार्नुभयो ।
