काठमाडौं । गृहमन्त्री सुधन गुरुङ आज सुनसरी जाने हुनुभएको छ। प्रधानमन्त्री तथा मन्त्रिपरिषद्को कार्यालयमा प्रधानमन्त्री वालेन्द्र शाहसँग भेटघाट गरेपछि उहाँ सुनसरीको देवानगञ्ज गाउँपालिका–३, कप्तानगञ्जतर्फ प्रस्थान गर्ने कार्यक्रम रहेको छ।
प्रधानमन्त्री तथा मन्त्रिपरिषद्को कार्यालयका अनुसार गृहमन्त्री गुरुङले गत साउन १० गते सुनसरीमा भएको झडपमा मृत्यु भएका ओमप्रकाश मेहता तथा उक्त घटनामा घाइते भई उपचारका क्रममा आज निधन भएका जयप्रकाश मेहताका परिवारसँग भेट गरी समवेदना व्यक्त गर्नुहुनेछ।
गृहमन्त्री गुरुङसँगै स्वास्थ्य तथा खाद्य स्वच्छतामन्त्री निशा मेहता पनि सुनसरी जाने कार्यक्रम रहेको छ। मन्त्री मेहताको गृह जिल्ला पनि सुनसरी नै हो।
सरकारले सुनसरी घटनापछि प्रभावित परिवारसँग प्रत्यक्ष भेटघाट गर्दै घटनाको अवस्था र आवश्यक सहयोगका विषयमा छलफल गर्ने उद्देश्यले मन्त्रीहरूको भ्रमण तय गरेको जनाएको छ।
