काठमाडौं । प्रजातान्त्रिक पार्टी नेपालले संवैधानिक राजसंस्था, वैदिक सनातन हिन्दु राष्ट्र, स्वायत्त शासन प्रणाली तथा भ्रष्टाचारमुक्त शासन व्यवस्थाको माग गर्दै भदौको अन्तिम सातादेखि सडक आन्दोलनमा उत्रिने तयारी गरेको छ ।
आइतबार राजधानीमा बसेको पार्टीको कार्यसम्पादन समितिको बैठकले आन्दोलनको तयारी गर्ने निर्णय गरेको पार्टी अध्यक्ष डा. तारानाथ लुइँटेलले जानकारी दिनुभयो । उहाँका अनुसार आन्दोलनबारे औपचारिक निर्णय भने पार्टीको केन्द्रीय समितिको बैठकबाट गरिनेछ ।
बैठकमा संवैधानिक राजसंस्था, वैदिक सनातन हिन्दु राष्ट्र, स्वायत्त शासन प्रणाली र भ्रष्टाचार नियन्त्रणलगायतका विषयमा गम्भीर छलफल भएको अध्यक्ष लुइँटेलले बताउनुभयो । उहाँले वर्षायाम सकिएलगत्तै पार्टी आन्दोलनमा जाने तयारीमा रहेको जानकारी दिनुभयो ।
अध्यक्ष लुइँटेलले प्रमुख राजनीतिक दलहरू नेपाली कांग्रेस, नेकपा (एमाले), नेकपा तथा प्रधानमन्त्री बालेन्द्र साहले विदेशीको प्रभावमा काम गरिरहेको आरोपसमेत लगाउनुभयो । उहाँले मुलुकमा सुशासन कायम गर्न भ्रष्टाचारविरुद्ध भइरहेका कारबाही प्रभावकारी हुन नसकेको दाबी गर्नुभयो ।
उहाँले भ्रष्टाचारीलाई पक्राउ गर्ने, थुन्ने र पुनः छाड्ने प्रवृत्तिले मुलुक अघि बढ्न नसक्ने भन्दै भ्रष्टाचार नियन्त्रणका लागि प्रभावकारी कदम चाल्नुपर्ने बताउनुभयो ।
प्रजातान्त्रिक पार्टी नेपालले संवैधानिक राजसंस्था, वैदिक सनातन हिन्दु राष्ट्र, सर्वधर्म समभावसहितको धार्मिक स्वतन्त्रता र स्वायत्त शासन प्रणालीलाई मुख्य एजेन्डा बनाएर आन्दोलन गर्ने जनाएको छ । आन्दोलनको औपचारिक निर्णय गर्न छिट्टै केन्द्रीय समितिको बैठक बोलाउने तयारीसमेत भइरहेको अध्यक्ष लुइँटेलले बताउनुभयो ।
