काठमाडाैँ । नेपाली काँग्रेसका उपसभापति विश्वप्रकाश शर्माले कुनै पनि प्रदेश सभा प्रतिपक्षविहीन बन्न नहुने स्पष्ट धारणा व्यक्त गर्नुभएको छ।
सोमबार पार्टी केन्द्रीय कार्यालय सानेपामा आयोजित पत्रकार सम्मेलनमा बोल्दै उहाँले प्रदेश सरकार गठन तथा पुनर्गठनका क्रममा लोकतान्त्रिक मूल्य–मान्यता, संविधानको मर्म र निर्वाचनबाट प्राप्त जनादेशलाई सम्मान गर्नुपर्ने बताउनुभयो।
उहाँले पछिल्लो समय प्रदेश सरकारमा सहभागी दलहरूबीच केही राजनीतिक समस्या देखिएको स्वीकार गर्दै ती विषयमा सार्वजनिक टिप्पणीभन्दा पनि आन्तरिक संवाद, छलफल र अभ्यासमार्फत समाधान खोज्ने प्रयास भइरहेको जानकारी दिनुभयो।
उपसभापति शर्माले संविधान निर्माणमा महत्वपूर्ण भूमिका खेलेका राजनीतिक दलहरूले प्रतिकूल परिस्थितिमा पनि संविधानको मूल मर्मको उल्लङ्घन गर्न नहुने उल्लेख गर्दै प्रदेश सरकार गठन वा फेरबदल हुँदा प्रतिपक्षको भूमिका सुनिश्चित हुनुपर्नेमा जोड दिनुभयो।
उहाँले लोकतान्त्रिक प्रणालीलाई सुदृढ बनाउन आवश्यक परे नेपाली काँग्रेस प्रतिपक्षमा बस्नसमेत तयार रहेको स्पष्ट पार्दै सबै प्रमुख दल एउटै सरकारमा सहभागी हुने प्रवृत्ति लोकतान्त्रिक अभ्यासका दृष्टिले उपयुक्त नहुने बताउनुभयो।
शर्माले प्रदेश सरकारसम्बन्धी अहिले देखिएका जटिलताहरू संवाद र सहमतिमार्फत समाधान गरिने विश्वास व्यक्त गर्नुभयो। नेपाली काँग्रेसले मात्र चाहेर निर्णय नहुने उल्लेख गर्दै उहाँले सबै राजनीतिक दलको आत्मसम्मान र सहअस्तित्वलाई सम्मान गर्दै साझा सहमतिका आधारमा प्रदेश सरकारको विषय टुङ्ग्याइने बताउनुभयो।
