काठमाडाैँ । नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले विभिन्न विषयगत कार्यक्रमलाई प्रभावकारी बनाउन ६ वटा उपसमितिका संयोजक चयन गरेको छ।
प्रतिष्ठानका प्रमुख तथा नेपाली कांग्रेसका उपसभापति विश्वप्रकाश शर्माको अध्यक्षतामा असार २५ र २६ गते बसेको प्रतिष्ठानको पाँचौं बैठकले प्रमुखको प्रस्तावमा विभिन्न उपसमितिका संयोजकको जिम्मेवारी तोक्दै अन्य विविध निर्णयसमेत गरेको हो।
बैठकले अपांगता, संवाद, समन्वय तथा सशक्तीकरण उपसमितिको संयोजकमा प्रकाश पन्थ, आदिवासी जनजाति संवाद, समन्वय तथा सशक्तीकरण उपसमितिको संयोजकमा रेशम गुरुङ तथा दुर्व्यसनमुक्त समाजका लागि सचेतना तथा समन्वय उपसमितिको संयोजकमा डा. डी.बी. सुनारलाई चयन गरेको छ।
यस्तै, पूर्व आप्रवासी समन्वय तथा अभिप्रेरणा अभियान उपसमितिको संयोजकमा विज्ञान प्रसाईं, सार्थक सम्प्रेषण उपसमितिको संयोजकमा मोहन गजुरेल तथा कृषि तथा कृषि उद्यम उपसमितिको संयोजकमा सिताराम काफ्लेलाई जिम्मेवारी प्रदान गरिएको प्रतिष्ठानले जनाएको छ।
प्रतिष्ठानका कामलाई थप व्यवस्थित, प्रभावकारी र विषयगत रूपमा अघि बढाउने उद्देश्यले उपसमितिहरू गठन गरी संयोजक चयन गरिएको कार्यवाहक मुख्य सचिव कृष्णप्रसाद दुलालद्वारा जारी विज्ञप्तिमा उल्लेख गरिएको छ।
