काठमाडाैँ । राष्ट्रिय स्वतन्त्र पार्टी (रास्वपा) को जारी महाधिवेशनअन्तर्गत दोस्रो दिनको बन्दसत्र निर्धारित समयमै सुरु हुन सकेन। आज बिहान साढे ८ बजे सुरु हुने तय भएको बन्दसत्र प्रतिनिधिहरूको नामावलीमा देखिएका त्रुटि सच्याउने काम नसकिएकाले ढिलिएको हो।
रास्वपाका नेता गणेश पराजुलीका अनुसार निर्वाचन समितिले सार्वजनिक गरेको प्रारम्भिक प्रतिनिधि नामावलीमा विभिन्न त्रुटि भेटिएपछि त्यसलाई सच्याउने र पुनः रुजु गर्ने प्रक्रिया चलिरहेको छ। सोही कारण बन्दसत्रको कार्यतालिका केही पछि सरेको उनले बताए।
निर्वाचन समितिले आइतबार करिब चार हजार महाधिवेशन प्रतिनिधिको प्रारम्भिक नामावली सार्वजनिक गरेको थियो। नामावलीमा भएका त्रुटि सच्याउन प्रतिनिधिहरूलाई निवेदन दिनुपर्ने व्यवस्था रहेकाले प्रक्रिया अपेक्षाभन्दा लामो भएको बताइएको छ।
आजको बन्दसत्रमा पार्टी नेतृत्वले विभिन्न महत्वपूर्ण प्रतिवेदन तथा प्रस्तावहरू पेश गर्ने कार्यक्रम रहेको छ। अनुशासन आयोगका संयोजक रमाकान्त रिमालले अनुशासनसम्बन्धी प्रतिवेदन प्रस्तुत गर्नेछन् भने कोषाध्यक्ष लिमा अधिकारीले वित्तीय प्रतिवेदन पेश गर्ने कार्यसूची छ।
त्यसैगरी महामन्त्री कविन्द्र बुर्लाकोटीले संगठनात्मक प्रतिवेदन, सहमहामन्त्री विपिनकुमार आचार्यले केन्द्रीय समितिबाट पारित विधान संशोधन प्रस्ताव र उपसभापति डा. स्वर्णिम वाग्लेले पार्टीको अर्थ–राजनीतिक प्रस्तावना प्रस्तुत गर्ने कार्यक्रम रहेको छ।
उक्त प्रतिवेदन तथा प्रस्तावमाथि छलफल र अनुमोदनको प्रक्रिया सम्पन्न भएपछि सभापति रवि लामिछानेले पार्टीको राजनीतिक प्रतिवेदन प्रस्तुत गर्ने कार्यतालिका तय गरिएको छ।
