काठमाडौं । अर्थ मन्त्रालयले कर्मचारी सञ्चय कोषको रिक्त प्रशासक पदमा खुला प्रतिस्पर्धाबाट पदपूर्ति गर्न आवेदन आह्वान गरेको छ। मन्त्रालयले सार्वजनिक सूचना जारी गर्दै योग्य तथा अनुभवी नेपाली नागरिकलाई आवेदन दिन आग्रह गरेको हो।
सूचनाअनुसार इच्छुक उम्मेदवारले १५ दिनभित्र अर्थ मन्त्रालयको वित्तीय क्षेत्र व्यवस्थापन तथा संस्था समन्वय महाशाखा, सिंहदरबारमा आवेदन पेश गर्नुपर्नेछ।
प्रशासक पदका लागि कर्मचारी सञ्चय कोष ऐन, २०१९ बमोजिम योग्यता तथा अनुभव पूरा गरेको हुनुपर्नेछ। साथै, अर्थ मन्त्रालयबाट स्वीकृत पदाधिकारी तथा सदस्यको नियुक्ति र मनोनयनसम्बन्धी मापदण्ड, २०७३ अनुसार अयोग्य नरहेको हुनुपर्ने सूचनामा उल्लेख गरिएको छ।
आवेदकले शैक्षिक योग्यता, अनुभव, नेपाली नागरिकताको प्रतिलिपि, व्यक्तिगत विवरण, पासपोर्ट साइजको फोटो तथा पाँच हजार शब्द ननाघ्ने व्यावसायिक कार्ययोजना समेत पेश गर्नुपर्नेछ। छनोटमा परेका उम्मेदवारले उक्त कार्ययोजनाको प्रस्तुतीकरण समेत गर्नुपर्ने व्यवस्था गरिएको छ।
दरखास्त दस्तुरस्वरूप पाँच हजार रुपैयाँ राष्ट्रिय वाणिज्य बैंकमार्फत राजस्व खातामा जम्मा गरी भौचरसहित आवेदन पेश गर्नुपर्नेछ। नियुक्त प्रशासकले प्रचलित कानुन तथा करारका शर्तअनुसार मासिक पारिश्रमिक तथा अन्य सेवा–सुविधा प्राप्त गर्ने जनाइएको छ।
अर्थ मन्त्रालयले आवश्यक परेमा प्राप्त आवेदन रद्द गर्न वा छनोट प्रक्रिया स्थगित गर्न सक्ने अधिकार पनि सुरक्षित राखेको जनाएको छ।
