काठमाडौं । भौतिक पूर्वाधार तथा यातायात मन्त्री सुनील लम्सालले निर्माण व्यवसायीप्रति दिएको अभिव्यक्ति सार्वजनिक भएपछि विवाद सिर्जना भएको छ। नागढुङ्गा–मुग्लिन सडक आयोजनाको स्थलगत अनुगमनका क्रममा उनले ढिलाइ गर्ने ठेकेदारलाई लक्षित गर्दै प्रयोग गरेको अभिव्यक्ति अहिले आलोचनाको केन्द्रमा परेको हो।
आइतबार अनुगमनका क्रममा मन्त्री लम्सालले सडक विस्तारमा देखिएको ढिलाइ र विशेषगरी विद्युत् पोल स्थानान्तरण कार्यमा भएको सुस्तताप्रति असन्तुष्टि जनाएका थिए। सो क्रममा उनले सम्बन्धित ठेकेदारलाई खोजेर काममा लगाउन निर्देशन दिँदै कडा शब्द प्रयोग गरेका थिए।
मन्त्री लम्सालले अनुगमनका क्रममा “काम नगरे खुट्टा भाँचिदिनु” भन्ने अभिव्यक्ति दिएको भिडियो तथा विवरण सार्वजनिक भएपछि उक्त भनाइलाई लिएर विभिन्न पक्षबाट आलोचना भइरहेको छ। कतिपयले यस्तो अभिव्यक्ति जिम्मेवार पदाधिकारीबाट आउनु उपयुक्त नभएको भन्दै प्रश्न उठाएका छन्।
यद्यपि मन्त्री लम्सालले आयोजनामा देखिएका समस्या समाधान गर्न मन्त्रालयले आवश्यक सहजीकरण गर्ने र निर्माण कार्यलाई निर्धारित समयमै सम्पन्न गर्ने वातावरण बनाउन सम्बन्धित निकायलाई निर्देशन दिएको जनाएका छन्।
नागढुङ्गा–मुग्लिन सडक आयोजना लामो समयदेखि विभिन्न प्राविधिक तथा व्यवस्थापकीय समस्याका कारण प्रभावित हुँदै आएको छ। पछिल्लो समय निर्माण कार्यले केही गति लिएको भए पनि विद्युत् पोल स्थानान्तरण लगायतका अवरोधले काममा ढिलाइ भइरहेको बताइन्छ।
